எஸ்.கே யோடு சில மணி நேரங்கள்........ஒரு சுவாரஸ்யமான பேட்டி!

இரவின் நுனியில் காத்துக்கிடக்கும் விடியலைப் போன்று கனன்று கொண்டிருக்கிறதும் எமது வாழ்க்கை. இடிபாடுகளுக்குள்ளும் நெரிசல்களுக்குள்ளும் உழன்று உழன்று நகர வேண்டிய எமது இலக்குகள் இருப்பது திறந்திருக்கும் வானங்கள் தாண்டியது.. அவற்றை நாம் தெரு முனைகளில் தேடுகிறோம் என்று என்ற எண்ணங்கள் சிலருக்கு வருவது அறியாமையின் உச்சம்.

எமது நோக்குகள் சமகாலத்தில் மிகையானவர்களுக்கு பிடிபட போவதில்லை. எமக்கும் பிடிபடாத மனிதர்களைப் பற்றிய கவலையும் எம்மைப் பற்றி கர்வமும் இல்லை ஆனால் சத்தியம் பேசுகின்ற நாக்குகள் அறுபடவேண்டும் என்ற மூளைகளை சிந்திக்கும் முன்பே பொசுக்கிவிடும் வல்லமை கொண்டவர்கள் யாம் என்பதை சப்தமின்றி தெரிவிப்பதும் எமது கடமை.

நீண்ட நெடிய எமது பயணத்தின் வழியே பதிவர்களின் பேட்டிக்காக யாம் தேடிச் சென்றமர்ந்தது சகோதரர் சுரேஷ் அவர்களின் வீட்டு மதில் சுவரில். பிரபலங்கள் என்ற வார்த்தைக்கு லெளகீக உலகம் கொள்ளும் பொருள் வேறு.... ஆழமான எமது பார்வைகள் கொண்ட பொருள் வேறு......

மாற்றுத் திறனாளியான சகோதரர் சுரேஷின் போரட்டங்கள் நமக்கு படிப்பினை மற்றும் மிகப்பெரிய வழிகாட்டல் .இளங்கலை மனோதத்துவ பட்டதாரியான அவர் கணிணி தொழில் நுட்பத்திலும் வல்லுனர். கணக்கிடலங்கா திறமைகளை உள்ளடக்கியிருக்கும் சகோதரர்....தன்னின் வெளிப்பாடுகளை எல்லாம் ஆக்கப்பூர்வமாக நேர்மறையாக வெளிப்படுத்திக் கொண்டு இருப்பவர்....

சமகாலத்தில் சோம்பித் திரியும், எதிர்மறை சிந்தனைகள் கொண்டு விரக்தியில் இருக்கும் அனைவரும் சுரேஷினை படிப்பினையாகக் கொள்ளல் நலம்....! பேட்டி என்று கேட்டதும் வேண்டாம் என்று அவர் மறுத்தும்... நமது அன்பிற்காக பிறகு ஒத்துக் கொண்டார்....

இதோ சுரேஷ் பேசுகிறார்.... கழுகிற்காக....




1) வலையுலகம் என்ற ஒன்றை எப்படி அறிந்தீர்கள்?


முதலில் கழுகுக்கு மிக்க நன்றி! நிச்சயமாக நான் பேட்டி தரும் அளவிற்கு மதிப்புடையவன் அல்ல! இருந்தாலும் என்னிடமும் பேட்டி காண்பதற்கு மிக்க நன்றி!


4 வருடம் முன்தான் எனக்கு கணிப்பொறியே அறிமுகமானது. அப்போதுதான் இணைய இணைப்பின் மூலம் வலைப்பூக்கள் இருப்பதை அறிந்தேன் நானும் விளையாட்டாக ஒரு வலைப்பூ தொடங்கி ஆங்கிலத்தில் ஒரு கட்டுரை எழுதினேன். அதை அப்படியே விட்டு விட்டேன். பின் தமிழில் வலைப்பூக்கள் இருப்பதை அறிந்தேன். சில ஃபோரம்களையும் அறிந்தேன். சிலவற்றில் இணைந்து சில மாதம் இருந்தேன். பின் வேலை, உடல்நிலை காரணமாக எதையும் தொடரமுடியவில்லை.


மீண்டும் சென்ற வருடம் மே மாதம் என் வேலையில் முழுமூச்சாக இறங்கிய போது ஒரு டைவர்சனுக்காக தமிழ் வலைப்பூக்களை பின் தொடர ஆரம்பித்தேன். பின் நானும் ஏதாவது எழுதலாம் என ஒரு வலைப்பூ ஆரம்பித்தேன்.

2) எது பற்றியெல்லாம் எழுத ஆசைப்படுகிறீர்கள்?


முக்கியமாக மனோதத்துவம் பற்றி எழுத வலைப்பூ ஆரம்பித்து தொழிற்நுட்ப விசயங்கள் அதிகமாகி விட்டது. தொழிற்நுட்பம், மனோதத்துவம், அறிவியல் இதைத்தான் அதிகமாக எழுத விரும்புகிறேன். ஆனால் சில கல்வி, சுயமுன்னேற்றம் போன்ற சமூக விசயங்களையும் எழுதலாம் என நினைக்கிறேன்.


3) மனோதத்துவத்தை நீங்கள் பயில எதுவும் பிரத்தியோக காரணம் உண்டா?


நான் பிசியோதெரபி படிக்கும் காலத்திலேயே மனோதத்துவம் மீது தனி ஈடுபாடு வந்து விட்டது. பின் அதையே முழுமையாக படித்தேன். உளவியல் மற்றவரை நன்றாக புரிந்து கொள்ள உதவும். அதை விட நம் மனதை/நம்மை நாமே முழுமையாக அறியலாம்.


4) பதிவுலகில் தற்காலிக நிலைமை பற்றி உங்கள் கருத்து?


எல்லோருக்கும் தாங்கள் கவனிக்கப்பட வேண்டும் என்ற எண்ணம் உள்ளது. அதில் தவறில்லை. சிலருக்கு ஒன்றிரண்டு பின்னூட்டம் போதும். சிலருக்கு மேலும் சில வேண்டும். எல்லோரும் வலைப்பூவை ஒரு டைம்பாஸாக, மாறுதலுக்காகவே எழுதுகிறோம். எனவே அவரவர் மனம் விரும்புபடி எழுதலாம். ஒருவரின் போக்கு மற்றவருக்கு பிடிக்காமல் போகலாம். எல்லோர் கருத்தும் எல்லோர்க்கும் பிடிக்காதே! ஆக்க பூர்வமாக எழுதுவதும், பொழுதுபோக்காக எழுதுவதும் அவரவர் விருப்பமே, யாரும் யாரையும் கட்டாயப்படுத்த முடியாது. எனக்கு இந்த சண்டைகள் மட்டும்தான் பிடிக்கவில்லை. ஏனெனில் பிரச்சினைகளை மறக்க வலைப்பூவை நாடும்போது அங்கும் பிரச்சினை என்றால் எப்படி? முடிந்த வரை எல்லோருடனும் இனிமையாக பழக முயற்சிப்போம். நம் கருத்தை மென்மையாக சொல்வோம். மற்றவர் கருத்தை அமைதியாக ஏற்போம்.


5) தன்னம்பிக்கை இந்த வார்த்தைகள் உங்களிடம் விளக்கம் பெற துடிக்கின்றன? விளக்குங்கள்?


தன்னம்பிக்கை என்பது ஒன்றுமில்லை உடலில் இருக்கும் உயிர் அவ்வளவுதான். அது இல்லாவிட்டால் வாழ்க்கை பூச்சியம்தான்!
தன்னம்பிக்கை இருந்தால் கோமாவில் இருந்தால் கூட உங்களை நோக்கி உலகை திரும்பி பார்க்க வைக்க முடியும். வாழ்க்கையில் எல்லோருக்கும் ஏதோ ஒரு பிரச்சினையை அடிக்கடி ஏற்பட்டு கொண்டுதான் இருக்கிறது. தன்னம்பிக்கை இருக்கும்போது அதை எப்படி தீர்ப்பது என்றுதான் மனம் யோசிக்கும், அதை நினைத்து கவலைப்பட்டு கொண்டிருக்காது. இந்த தன்னம்பிக்கை உங்களுக்குள்தான் இருக்கிறது. நீங்கள் நினைத்தால் இதை பெருமளவு வளர்த்து கொள்ளலாம்.


6) ஏன் நல்ல பதிவுகளை வாசகர்கள் தேடிப்படிப்பதில்லை?


அப்படி சொல்ல முடியாது. ரசனைகள் பலவிதம். ஒரு தொழிற்நுட்ப பதிவு இருக்குன்னா அது படிக்கிறவருக்கு தேவைப்பட்டாலோ அந்த டாபிக் கவர்ந்தாலோதான் அதை அவர் படிப்பார், ரசிப்பார். அது போலத்தான் எல்லாமே. சில சமயம் சிலரை அந்த நல்ல பதிவுகள் கவராமல் போகலாம். அதே சமயம் அந்த நல்ல பதிவின் தேவை அவசியமாகும்போது அதை நாடிச் சென்றும் படிக்கலாம். இங்கே வைக்கப்படும் தலைப்புக்களும் டாபிக்களும் தான் பெரும்பாலும் வாசிப்பவர்களை ஈர்க்க காரணமாகிறது. மேலும் இங்கே அதை விளம்பரப்படுத்தும் யுக்தியும் தேவைப்படுகிறது. நம் வலைப்பூ ஓரளவு பிரபலமாகும் வரை நம் பதிவுகளுக்கு வரவேற்பு இருக்காது.


7) எதை எல்லாம் மன அழுத்தம் என்று சொல்கிறோம்?


இது ஒரு நல்ல கேள்வி. ஒருவர் மற்றவர் கெட வேண்டும் என நினைக்கிறார். அது நடக்கவில்லை என்றால் அவருக்கு மன அழுத்தம் ஏற்படுகிறது. ஒருவர் மற்றவர் நன்றாக இருக்க வேண்டும் என நினைக்கிறார் அது நடக்கவில்லை என்றாலும் மன அழுத்தம் ஏற்படலாம். நாம் எல்லோருக்கும் அடுத்தவாரம் இந்த இடத்துக்கு போகணும், இந்த புரொமோசன் கிடைக்கணும் இப்படி சிறியதாக, பெரியதாக பல டார்கெட்கள் இருக்கும். அதெல்லாம் நிறைவேறாதப்ப கவலை, கோபம், எரிச்சல் போன்றவை ஏற்படலாம். அதுவே தொடர்ந்து நடந்தா மனசு அதற்கான எதிர்விளைவை செய்ய முடியாம கஷ்டப்படுவதைதான் மன அழுத்தம் என்கிறோம்.




8) ஒருவருக்கு எந்த நிலையில் மன அழுத்தம் வருகிறது ?


முந்தைய கேள்வியிலேயே இதை சொல்லிருக்கிறேன். மனசு நினைக்கும் ஒன்று நிறைவேறாதபோது, அதுவே தொடர்ந்து நடக்கும்போது, மனம் அது நம் கட்டுப்பாட்டில் இல்லையே என நினைத்து கஷ்டப்பட்டும்போதுதான் மன அழுத்தம் ஏற்படுகிறது.


9) எப்போதும் மன அமைதியா இருக்க என்ன செய்யலாம்?


ரொம்ப கஷ்டமான கேள்வி. அப்படி இருப்பது ரொம்ப ரொம்ப கஷ்டம்!!!! மனிதனுக்கு ஆசைகள், விருப்பங்கள், இலக்குகள், எதிர்பார்ப்புகள் போன்றவை இல்லாவிட்டால்தான் எப்போதும் மன அமைதியாக இருக்க முடியும். இருந்தாலும் நாம் முடிந்த வரை மன அமைதியோடு இருக்க செயல்கள், எண்ணங்கள் போன்ற எல்லாவற்றிலும் திருப்தி வேண்டும். மற்றபடி தியானம், யோகா போன்றவையெல்லாம் கூடுதலானவைதான்!

10 ) சினிமா பற்றிய உங்கள் ஆர்வம் எப்படி?


சினிமாவில் எனக்கு எந்த நடிகர் மீதும் பற்றும் கிடையாது துவேசமும் கிடையாது. என்னை பொறுத்தவரை காமெடியான படங்கள் எதுவானாலும் பார்ப்பேன். எந்த படமாக இருந்தாலும் நான் முதலில் எதிர்ப்பார்ப்பது நகைச்சுவையைதான்! சில திரில், திகில் வகையான படங்களும் பிடிக்கும். ஆங்கிலப் படங்களை இதற்காகத்தான் பார்க்கிறேன்.




இந்த கேள்விக்கு மன்னிக்கவும்..........சுரேஷ்.. இருந்தாலும் நிறைய பேருக்கு தெரியவேண்டும் என்பதற்காக கேட்கிறோம்...


11) மாற்றுத் திறனாளியான நீங்கள்...கல்வி கற்கும்போது சந்தித்த சங்கடங்கள் அதை நீங்கள் தாண்டி வந்த முறைகள்...கொஞ்சம் கூறுங்களேன்?


வாழ்வில் நான் மறக்க நினைக்கும், ஆனால் மறக்க முடியாக சங்கடங்கள் பல உள்ளன. பள்ளி வாழ்க்கை வரை பெரிதாக எனக்கு சங்கடங்கள் வந்ததில்லை! கல்லூரி நாட்களில் இறுதியாக ஏற்பட்ட சம்பவம்தான் என்னை பாதித்தது. பெரும்பாலும் சிறு வயது முதலே நான் செல்லும்போது என்னை ஒரு வித்தியாசமாக பலர் பார்ப்பதை நான் அனுபவித்துள்ளேன். அவை ஆரம்ப காலங்களில் சங்கடமாக இருந்தபோதும் பின் பழகி விட்டன.

12) தாய் தந்தை........ஒருவரின் வாழ்கையில் எவ்வளவு மதிக்கப்பட வேண்டியவர்கள்?


வாழ்வில் நீங்கள் காணக் கூடிய தெய்வங்கள் அவர்கள். என் வாழ்வில் என் பெற்றோர்கள் இல்லாவிட்டால் நான் இன்று உயிருடனே இருந்திருக்க மாட்டேன். வாழ்வின் தோல்விகள் அனைத்திலும் ஊக்கம் தந்து உறுதுணையாக கைதூக்கி விட்டார்கள். வாழ்வில் இனி வரும் காலங்களில் நான் எதையாவது சாதிக்கலாம், அதன் முழு பலனும் இவர்களுக்கே போய் சேரும். பெற்றோர்கள் நம் ஆறாவது புலன்கள்!

(கழுகு இன்னும் உயரப் பறக்கும்)

Read more »

18+...........கேவலங்கள்....!

குப்பைகள் தொடர்ந்து அள்ளப்படும்....

ஆச்சர்யமாய் தானிருக்கிறது சமுதாயத்தில் புரையோடிப்போயிருக்கும் ஆணாதிக்கத்தின் அசிங்கங்களை நினைக்கும் போது, சாதாரண பத்திரிக்கையிலிருந்து, டி.வி.விளம்பரம், சினிமா, அரசியல், வலைப்பூக்கள் என்று இலை மறைகாயாய் புரையோடிபோயிருக்கும் இந்த விஷத்தை, விஷம் என்று அறிந்தே நாம் அனுமதித்துக் கொண்டுதானிருக்கிறோம்.

பெண்ணை ஆபாசமாக சித்தரிக்கும் தமிழ் சினிமாக்களில் எல்லாம் பெண்ணை கற்பழிப்பது அவளுக்கு அளிக்கப்படும் தண்டனையாகாவேதான் காட்டப்பட்டிருக்கிறது. ஏதாவது ஒரு சினிமாவில் அந்த ஆண் தவறு இழைத்துவிட்டான் என்று அவனை வேட்டி சட்டையை அல்லது பேண்ட்டை கழட்டி துன்புறுத்தும்படியோ அல்லது பாலினம் சொல்லி அசிங்கப்படுத்தும் வார்தைகளோ வந்திருக்கின்றனவா? வராது... வரவே வராது... காலமெல்லாம் இதைத்தாதனே கற்று பொது புத்தியில் ஏற்றி வைத்திருக்கிறோம்....

மகாபாரத துச்சாதனன் கூட திரெளபதியின் துகிலைத்தான் உரிந்திருக்கிறான்.....தருமனின் வேஷ்டியை அல்ல..............

இதன் நீட்சிதான்.. பத்திரிக்கைகளின் கவர்ச்சிப்படங்கள் தொலைக்காட்சி நாடகங்களிலும் கூட்டம் கூட்டமாய் பெண்கள் அழும் காட்சிகள்......என்ன நடக்கிறது? எங்கே போய்க்கொண்டிருக்கிறோம்...!

சினிமா விமர்சனம் என்ற பெயரில் ஆபாசப் படங்களை விமர்சித்து.. பெண்ணை ஒரு போகப்பொருளாய் சித்தரிக்கும் படங்களை போட்டு விட்டு பகிங்கரமாய் பதின்ம வயதினரை தமது வலைப்பக்கங்களுக்கு இழுக்கும் யுத்தியாக.. விளம்பரங்கள் வேறு செய்கிறார்கள்.. அடுத்தவாரம் இதை எழுதுவேன் அதை எழுதுவேன் என்று,.... இது போன்ற போக்குகள் தனிமனிதரால் நடத்தப்படும் வலைப்பூக்கள் வரைக்கும் வந்திருப்பது...அவலத்தின் உச்சம்தானே....?

பெண்ணைப் போகப்பொருளாய் சித்தரிக்கும் வார்த்தைகளை எப்படி உங்களின் விமர்சனத்திற்குள் கொண்டு வருகிறீர்கள். போதாக்குறைக்கும் 18+ ஜோக்குகள் வேறு வலைப்பூக்களில் இடைசெருகலாய்... இதில் தவறு என்ன இருக்கிறது 18+ என்றுதான் நாங்கள் போடுகிறோமே என்று வேறு நியாயம்..கற்பித்தல் வேறு...

18+ என்று போடுவதின் நோக்கமே...சும்மா போறவன இந்தப் பக்கம் வாடா மச்சி என்று பாக்கு வெத்திலை வைத்து கூப்பிடுவது போலத்தானே...! காமம் இல்லாமல் வாழ்க்கை இல்லை அது எப்போதும் சங்ககாலத்தில் இருந்து நமது சமுதாயத்தில் இருந்தே இருக்கிறது ஆனால் அதன் வெளிப்பாடு மிக நளினமாய் ரசனைக் குரியதாய் இருந்திருக்கிறது. அப்படிப்பட்ட வெளிப்பாடுதான்.. நமது ஊர் கோவிலில் இருக்கும் சிற்பங்களும் ஓவியங்களும். தேவையின் அடிப்படையில் கருத்துக்களை சொல்ல வரும் இடத்தில் சில நேரங்களில் காமம் பற்றி எழுதவேண்டிய நிர்ப்பந்தங்கள் வரும்..ஆனால் அதன் வெளிப்பாடும் அர்த்தங்களோடு அழகாய் இருக்க வேண்டும்...

நியாயங்கள் சொல்ல நீ யார் ? இதுதானே உங்கள் கேள்வி...........சரி ஒன்று செய்யுங்கள்! உங்கள் கணிணியை அணைத்துவிட்டு.......தனியே போய் அமர்ந்து கொள்ளுங்கள். கண் மூடி யோசியுங்கள்........நான் செய்வது சரியா? ஊரும் உலகமும் உழன்று கொண்டிருக்கும் வழமைகளை எல்லாம் நாமும் திரும்பச் செய்தால் அது சரி ஆகுமா? கேளுங்கள் உங்களுக்குள்ளாகவே கேளுங்கள்... ! என்ன பதில் கிடைக்கிறதோ அதை மனசாட்சிக்கு விரோதமின்றி செய்யுங்கள்...!

கருப்பாய் இருப்பது குற்றம் என்று உங்களை சிவப்பாக்க அழகு க்ரீம் விளம்பரம் செய்கிறானே..........அதை ரசித்துப் பார்த்ததில் ஆரம்பிக்கிறது நமது முட்டாள்தனமான நம்பிக்கைகள்....!

அதுவும் பெண்களை குறி வைத்துதான்.. !

உருவாக்குபவனுக்கு ஓராயிரம் வேண்டுகோள்கள் வைத்தாலும் தன்னின் பெருமை பேசும், புகழ் விரும்பு எந்த மனிதனும் தனது அசிங்கத்தை நிறுத்திவிட்டு எதார்த்த வாழ்க்கைக்கு வரப்போவதில்லை வந்ததாய் சரித்திரமும் இல்லை.....

நேர்மையான மனிதர்களே....!திரைப்பட ரசிகர்களே! வாசகர்களே..........சிந்தியுங்கள்...எந்த கருத்தை தேடி உங்கள் மனம் ஓடுகிறதோ அதில் என்ன பயன் இருக்கிறது... என்று? நீங்கள் அப்படி ஓடுவதால் நல்ல விசயங்கள் உங்கள் சந்ததியினருக்கும் கிடைக்காமல் போக மறைமுக காரணமாகிவிடுகிறீர்கள்.....

இப்போது சொல்லுங்கள் எதை போதிக்கப்போகிறீகள் உங்கள் மகன் அல்லது மகளுக்கு?

ஆபாச எழுத்துக்களையும், சினிமாக்களையும், பத்திரிக்கைகளையும் படிக்கவா...?

இல்லை......

சந்தோசத்தையும், எதிர்கால வாழ்கையில் அமைதியையும் நிம்மதியையும் கொடுக்கும் அறிவுக்களஞ்சியங்களையும், நகைச்சுவையை அதிகரிக்கவைக்கும் படைப்புகளையுமா?

நீங்கள் தீர்மானியுங்கள்........

(கழுகு இன்னும் உயரப் பறக்கும்)

Read more »

'பஞ்ச்' சாமிர்தம்.....நிஜமாவே இனிக்கும்...!

பஞ்ச் 1: தமிழ்நாட்டின் அடுத்த 5 வருட தலை எழுத்தை தீர்மானிக்கபோகும் தேர்தல் இதோ வரப்போகிறது. மக்கள் தயார் ஆவதற்கு முன்னால் கட்சிகள் அலர்ட் ஆகத்தொடங்கிவிட்டன. கலைஞர் தொலைக்காட்சியில் குறும்படத்தை ஒத்த காட்சிகள் விரிந்து அரசின் சாதனைகளை விளக்கும் நிகழ்வுகள் தொடங்கிவிட்டன. அ.தி.மு.கவும் எழுந்து கொள்ளும், கேப்டனும் முழு மூச்சுடன் இயங்க ஆரம்பிப்பார்.....

தீர்மானிக்கும் வலுவற்ற மக்களின் மூளைகளை ஊடங்கள் கண்டிப்பாய் சலவை செய்யத்தான் போகின்றன. தேர்தல்ல யார் ஜெயிப்பான்னு கேக்குறீங்களா....?

' என்ன கேள்வி இது? யார் அதிக பணமும் மக்களின் மூளைகளை வசியம் செய்யும் யுத்தியும் அட்டகாசமாய் செய்கிறார்களோ அவர்கள்....!

பஞ்ச் 2: சமீபமாய் எல்லோரும் பார்த்த ஒரு நிகழ்வுதான் நடிகர் விஜயகுமாரின் குடும்பத்தில் நடக்கும் கேவலமான ஒரு சண்டை அதுவும் ஒரு பாலகனை முன்னிறுத்தி நடந்து கொண்டிருப்பதும் சாதாரண குடும்பச் சண்டையை தீர்க்க முடியாமல் ஏதேதோ உந்துதலின் பேரில் சட்டமும் காவல்துறையும் கைகட்டி நிற்பதும் ரொம்ப அசிங்கமாக இருக்கிறது.

அதுவும் விஜயகுமாரின் மகளைச் சுற்றி சுற்றி ஊடகங்கள் நடைபோட்டு அவர் அத்து மீறிகாவல் துறையையும் சட்டத்தையும் பேசும் ஆபாச வார்த்தைகளையும் வெளிச்சம் போட்டுக் காட்டி தங்கள் டி.ஆர்.பி ரேட்டிங்கை தக்கவைத்துக்கொள்ள முயல்கின்றன.

வெகு ஜன ஊடகங்கள் இப்படி தேவையில்லாத விருந்து வைப்பதை நிறுத்துமா? அரசு ... இது போன்ற அத்துமீறல்களை சட்டப்படி தீர்க்குமா?

பஞ்ச் 3: தமிழ்நாட்டு அரசியலில் காமராஜருக்கு அப்புறம் கால்வைத்து நிற்க முடியாமல் திராவிட கட்சிகளுடம் கூட்டுவைத்து கும்மியடிக்கும் காங்கிரஸின் குறி இப்போது இளைஞர்கள்தான். இளைஞர்களைப் பிடிக்கவைக்கும் பொறி ராகுல் காந்தி. தமிழனுக்கும் தமிழ்நாட்டிற்கும் எதிரான சில உள்கொள்கைகளை வைத்துக்கொண்டு காந்தியையும் நேருவையும், இந்திராவையும் காட்டி ஓட்டுக் கேட்கும் இவர்கள்....

ஈழத்தில் நடாத்தி முடித்த கொலைகளும், ஊரைக் கொள்ளையடித்து உலையில் போட்ட ஸ்பெக்டரமும் மக்களின் நினைவுகளுகுள்ளேயே வராது என்று நினைத்துக் கொண்டு காய்களை நகர்த்துகிறார்கள்....!

உண்மைகள் உரைக்காமால் வேறு யாரை தேர்ந்தெடுப்பது என்ற குழப்பத்தில் கையை பார்த்துக்கொண்டே இருக்கப்போவது நமது தலை எழுத்து.

பஞ்ச் 4: ஏழைககள் தமிழ் நாட்டில் இருக்கு வரை இலவசங்கள் தொடரும் என்ற முதல்வரின் கூற்றுக்கு பின்னால் மிகப்பெரிய கருணை இருப்பது போல மக்கள் நினைத்துக் கொள்வார்கள் ஆனால் ஏன் ஏழைகள் இருக்கிறார்கள் என்ற எதிர் கேள்விக்கு பதில் சொல்ல திரணியிருக்குமா? இலவசங்கள் கொடுத்துக் கொண்டு நாங்கள் பேர் வாங்கிக் கொள்கிறோம்..ஏழைகளே நீங்கள் ஏழைகளாக இருங்கள்...

இது ஆளும் கட்சி மட்டுமல்ல...தமிழ்நாட்டு அரசியல்வாதிகளின் தார்மீக சூத்திரமே இதுதான்...! சரி என்னதான் செய்வது ஏழைகளாகவே இருப்போம் ...நீங்கள் எல்லாம் ராஜவாகவே இருக்கங்கள்...!

பஞ்ச் 5: வலைப்பூக்களில் சினிமா விமர்சனம் எழுதுபவர்களில் இருந்து சாதரண கட்டுரை எழுதுபவர்க்ள் எல்லாம் தேவையில்லாத பெண்களின் கவர்ச்சிப் படத்தை போட்டுவிடுகிறார்கள். கேட்டால் ஆபாசம் எங்கு இல்லை என்ற கேள்வி வேறு வக்கனையாய்... ! இன்னும் கேவலமான தலைப்புகள் வேறு.... ! ஆபாச படங்களை விமர்ச்சிகிறேன் பேர்வழி என்று பொதுவாக மக்களுக்கே தெரியாத அசிங்கங்களை எல்லாம் எடுத்து வந்து ... பொதுவில் கொட்டுகிறார்கள்..!

என்ன செய்வது.. தமிழில் டைப் செய்ய மென்பொருளும், இணைக்க திரட்டிகளும் இருக்கின்றன... ! பாவம் வலைப்பூவிலாவது நேர்மையான போக்கும் இருக்கும் என்று வாசிக்க வருபவன் கதி அதோ கதிதான்....!

இந்த வராத்திலிருந்து 'பஞ்ச்' சாமிர்தம் உங்களை சிந்திக்கத் தூண்டும் வகையில் வரும்....உங்கள் கருத்துக்கள் விமர்சனங்கள் வரவேற்கப்படுகின்றன.

(கழுகு இன்னும் உயரப்பறக்கும்)

Read more »

ஹிட்ஸ்.......சீரழிவினை நோக்கி......!

புது வருடம் எல்லா வளத்தையும் எல்லோருக்கும் கொடுக்கட்டும்.......நண்பர்களே....!

சந்தோசமாய் இருக்கும் நேரங்களை அனுபவிக்கும் நாம் நம்முள் இருக்குக்கும் அழுக்குகளையும் கழுவியே ஆகவேண்டும். சமீபகால பதிவுலக அழுக்கு 'ஹிட்ஸ்' என்ற மாய வார்த்தையை நோக்கி நகரும் பதிவர் கூட்டத்தின் மனோ நிலைதான்.

சமுதாய சாடல்களையும், அவலங்களையும் முன்னெடுத்துச் செல்லும் அதே நேரத்தில் பதிவுலகம் என்ற இல்லாத ஒரு மாயக்கட்டில் ஏற்படும் விரிசல்களையும் சரி செய்ய வேண்டியது ஒவ்வொருவரின் கடமை என்பது போன்று எமக்கும் அது தலையாய கடமை. ஒரு பல்கலைக்கழக துணைவேந்தரோடு சமீபத்தில் தொலைபேசியில் உரையாடக் கிடைத்த வாய்ப்பின் போது யாம் எழுதி வரும் கட்டுரைகள் பற்றியும் மக்களின் விழிப்புணர்வுக்காக யாம் முன்னெடுத்து செல்லும் வழி முறைகள் பற்றியும் கூறிக்கொண்டிருந்த பொழுது அதற்கான மறுமொழியாக அவர் கூறியது எமக்கு திடுக்கிடலுடன் கூடிய ஆச்சர்யத்தை ஏற்படுத்தியதன் விளைவுதான் இந்தக் கட்டுரை.

வலைபூக்களில் எழுதும் மனிதர்கள் நல்ல கட்டுரைகளைத் தருவித்து அதில் மக்களை வசீகரம் செய்து தம் வலைப்பக்கங்களுக்கு வருகையை அதிகரிக்க வேண்டுமே அன்றி... மக்களை மயக்கும் வித்தைகளையும், கவர்ச்சிகரமான உணர்ச்சியைத் தூண்டக்கூடிய செய்திகளையும் இட்டு...தமது பக்கங்களின் வருகையைக் கூட்ட நினைப்பது அநாகரீகத்தின் உச்சகட்டம்.

தமிழ் நாட்டின் சக்கி மிகுந்த பல்சுவை இதழ்கள் இரண்டு. ஒன்று குமுதம் மற்றொன்று ஆனந்த விகடன், இந்த இரண்டு பத்திரிக்கைகளுமே....பல்சுவை இதழ்கள். மனிதர்களின் மனம் கவர இவை வைத்திருக்கும் யுத்திகள் நின்று கவனித்து யோசிக்க வேண்டிய ஒன்று.....ஆமாம்...சினிமா பக்கங்களும் இருக்கும் அதே நேரத்தில் சிரித்து மகிழ வயிறு குலுங்கும் நகைச்சுவையும் இருக்கும், சமகால அரசியலிருக்கும், விழிப்புணர்வு சிறுகதைகள் இருக்கும், ஆழமான குடும்ப ஒட்டம் கொண்ட தொடர்கள் இருக்கும், ஆன்மீகமும் இருக்கும், கல்வி பற்றிய அறிவிப்புகளும் இருக்கும்,

முழுக்க முழுக்க சினிமாவையும், கவர்ச்சியையும் பேசும் புத்தகங்கள் அதிக அளவில் விற்கப்பட்டிருக்கலாம் ஆனால் அவை காலங்கள் கடந்து நின்றிருக்கின்றனவா? இல்லையே? அந்த அந்த பருவத்தில் அவை முன்னணியில் இருப்பது போல தோன்றும் ஒரு மாயவலையிலேயே அவைகள் காலப்போக்கில் அழிந்தே போகும்.

இங்கே இவர்களின் ஹிட்ஸ் பைத்தியமும் அப்படித்தான்.. அந்த அந்த சமயத்தில் வரும் மக்கள் கூட்டத்திற்காக தம்மின் படைப்புகளின் தரத்தை பார்க்காமல், தான் ஒரு படைப்பாளிதானா என்றும் உற்று நோக்காமல்.. தினம் ஒரு பதிவும் நூற்றுக்கு மேற்பட்ட மறு மொழிகளையும் எதிர்பார்த்து தம்மை முன்னிறுத்தும் முயற்சிகளுக்குப் பின்னால் தரமற்ற படைப்புகளைக் கொடுத்து எம்மக்களை முட்டாளாக்கும் பணியைத்தான் இவர்கள் செவ்வனே செய்து வருகிறார்கள்.

திரட்டிகளின் சமீபத்திய போக்குகள் எப்போதும் நல்ல கட்டுரைகளை மக்களுக்கு தருவித்து கொடுப்பதாய் இல்லை. இவர்கள் கொடுக்கும் தரவரிசைகள் ஹிட்ஸ் என்று சொல்லக்கூடிய விசயத்தையும் பின்னூட்டங்களின் எண்ணிக்கைகையும் வைத்துதானிருக்கிறது. பாம்பு வைத்து வித்தை காட்டும் மோடி மஸ்தானுக்கும், அரைகுறை ஆடையோடு ஆடும் ஆபாச நடனங்களுக்கும் கூட்டம் வரும்? ஆனால் தரமிருக்கிறதா அவற்றில்?????

இப்படிப்பட்ட ஒரு தரமற்ற தரவரிசை கொடுக்கும் திரட்டிகளை கேட்க இங்கு யார் இருக்கிறார்கள்? எல்லோரும் நல்லவர்களாக இருக்க வேண்டும் என்ற எண்ணத்தில் நாம் பரப்பும் மெளனம் விதைப்பது கொடுமையான விசம் என்பது யாருக்கும் தெரிவதில்லை.

இன்னும் ஒரு மிகப்பெரிய மனித அவலமும் இங்கே நடந்தேறிக் கொண்டிருக்கிறது.....

தரவரிசையில் தன்னை முன்னிலைபடுத்த கிட்டத்தட்ட ஒரு மனோநிலை சிதைக்கப்பட்ட நிலையில் மனிதர்கள் யுத்திகள் செய்வதும் காலையும் மாலையும் தனது பதிவின் வருகைப்பதிவினை பொறுத்து இவர்களின் மனம் மாறுதலும், கொஞ்சம் ஹிட்ஸ் குறைந்தால் ஒரு மன உளைச்சலுக்கு ஆளாவதும் மேலும் தனது வலைப்பூவில் பின்னூட்டங்களை அதிகரிக்க பொழுதெல்லாம் பிற வலைப்பூக்களுக்குப் போய் வாசிக்காமலேயே எல்லா வலைப்பூக்களிலும் டெம்ளட் பின்னூட்டங்கள் இட்டு தங்களது வலைப்பக்கங்களுக்கு வந்து வோட்டும் பின்னூட்டமும் இடவேண்டும் என்று மறைமுக நிர்ப்பந்தங்கள் செய்வதும் என்று இங்கே நடந்து கொண்டிருக்கும் ஒரு அவலம்...........அனைவரும் அறிந்ததே........ஆனால்.........நம்மை நாமே ஏமாற்றிக் கொண்டு அவையெல்லாம் சரி என்பது போல வாழ பழகி விட்டோம்.

எனக்குத் தெரிந்த ஒருவர்....இரவில் உறங்குவதே இல்லை.......கணிணியைவிட்டும் நகர்வதே இல்லை...எப்போதும் ஹிட்ஸ் எவ்வளவு மற்றும் கூட்டம் வரவழைக்க என்ன எழுதலாம் என்று யோசித்து யோசித்து இப்போது மன வியாதி முத்திப் போய் ஒரு பைத்தியம் பிடிக்கும் நிலையிலிருக்கிறார். இந்த சூழல் மாற வேண்டாமா?

அலெக்சா ரேங்கும், இத்தனை ஹிட்ஸ்கள் நான் வாங்கியிருக்கிறேன் என்று சொல்வதும்தான் உங்கள் தகுதியா? வலது கரம் எடுத்து உங்களின் இடப்பக்கம் உள்ள இதயத்தில் கைவைத்து சொல்லுங்கள்...?

மாறவேண்டும்...தோழர்களே...! மனிதர்கள் நல்ல எழுத்தை தேடவேண்டும்.... தேட வைக்க வேண்டும். நகைச்சுவையாய் எழுதும் தோழர்களை மொக்கைகள் என்று கிண்டல் செய்யும் நாம் இந்த ஹிட்ஸ் விரும்பிகளை என்ன செய்யப்போகிறோம்?

இந்த கட்டுரை ஒரு உச்சபட்ச ரெட் அலெர்ட், நண்பர்களே, கணவன்மார்களே, மனைவிமார்களே, பெற்றோர்களே, அல்லது பிள்ளைகளே...........உங்கள் வீட்டில் ஒருவர் இப்படி இருக்கலாம்...........

இவர்களை மீட்டெடுக்கவேண்டியது உங்கள் கடமை. தேவைப்பட்டால் மருத்துவ உதவிகள் கூடச் செய்யுங்கள்............!

ஆரோக்கியமான சூழல் எங்கும் பரவட்டும்........! ஆரோக்கியமாய் எம் மனிதம் செழிக்கட்டும்!

(கழுகு இன்னும் உயரப்பறக்கும்....)

Read more »