கே.ஆர். பி செந்திலுடன் ஒரு சந்திப்பு!

பதிவர்களின் பேட்டியை எடுத்து வாசகர்களுக்கு யாம் கொடுத்துக் கொண்டிருக்கும் தொடர்ச்சியில் கே.ஆர்.பி செந்திலிடம் பேட்டி எடுத்த போது ஏற்பட்ட அனுபவம் அலாதியானது. வலையுலகில் அவர் எழுத வந்தது மட்டுமே அனுபவம் என்று நினைத்தால் அது தவறு, வாழ்வில் அவரின் அனுபங்களும் சந்தித்த மனிதர்களும் ஏராளம். யாம் கழுகு வலைப்பூ தொடங்கிய போதே எமக்கு ஆதரவுகளையும் உத்வேகத்தையும் கொடுத்து அவ்வப்போது எமது பயணத்திற்கு தேவையான ஆலோசனைகளையும் கொடுத்து வரும் ஒரு பொது நலம் விரும்பி.

சிவப்பு சிந்தனையுள்ள கே.ஆர்.பி.செந்தில் என்று கூறியவுடன் சே குவராவின் பிம்பம் நமது முன் வருவது தடுக்க இயலாதது. சேவின் புரட்சி சிந்தனைகளை தமது எழுத்திலும் கொண்டு வரும் செந்தில் அரசியல் கட்டுரைகளும் சமுதாய பார்வைகளும் தகிக்கும் நெருப்பாய்தான் இருக்கும். சூடுகளுக்கு நடுவே கவிதைகளிலும் தனது முத்திரை பதித்த செந்தில்.. பதிவர் என்ற நிலை கடந்து இன்று புத்தக ஆசிரியர், பதிகப்பக உரிமையாளர், என்று பன்முகம் எடுத்துள்ளார். 

அவரின் பயணத்தில் ஏற்பட்ட அனுபவங்களையும் தெளிவுகளையும் கேள்விகளாக கேட்க வேண்டும் என்ற எமது உத்வேகத்திற்கு தோளில் கை போட்டு எதார்த்தமாக அவர் அளித்த பதில்களை கழுகு வாசகர்களுக்காக தொகுத்திருக்கிறோம். செந்திலுக்கு நன்றிகள் கூறியபடி அவரின் பேட்டி.. இதோ...

1) செந்தில் என்றவுடன் சேகுவரா படம்தான் எல்லோருக்கும் நினைவில் வரும். சே உங்கள் மனதை ஆக்ரமித்தது எப்போது? ஏன்?


தன் இனம், மொழி, நாடு என்கிற பேதம் பார்க்காமல் ஒடுக்கப்பட்ட மக்கள் எங்கிருந்தாலும் அவர்களுக்காக போராடும் மனிதனாக சே எனக்கு புத்தக வடிவில், என்னுடைய 28 - வது வயதில் அறிமுகமானார். அதன்பிறகு அவரை மேலும் மேலும் அறிந்துகொண்டபோது அந்த ஆளுமை என்னை அடித்துப்போட்டது. அவர் மாதிரியே இனம், மொழி, நாடு கடந்த சில விசயங்களை நண்பர்களுடன் யோசித்துகொண்டிருக்கிறோம். காலம் எங்களுக்கு சாதகமாக இருக்கும் என நம்புகிறோம்.. 

2) தொடர்ச்சியாக பல வருடங்கள் எழுதி வருகிறீர்கள்... எதை நோக்கி உங்கள் பயணம்?

1998 சிங்கப்பூரில் இருந்தபோது அங்கு வெளியாகும் தமிழ் முரசு நாளிதழில் தொடர்ந்து ஒவ்வொரு ஞாயிறும் என் கவிதைகள் வெளிவரும். அப்போது முதலாக எழுதினாலும், பதிவுலகம் வந்தபின்னர்தான் தொடர்ந்து எழுதுகிறேன். எதிர்காலங்களில் வியாபாரம் சம்பந்தமான துறை சார்ந்த விசயங்களை மட்டுமே எழுதுவேன் என நினைக்கிறேன். அதற்காக  நிறைய படிக்க வேண்டியிருக்கிறது.

3) சிவப்பு சிந்தனையுள்ள உங்களை சமகால அரசியல் எப்படியெல்லாம் சிரமப்படுத்துகிறது?


சிவப்பு சிந்தனை என்பது தற்காலங்களில் வெகுவாக பின்னுக்கு தள்ளபட்டுவிட்டதாக பலரும் என்னிடம் சொல்கிறார்கள். ஆனால் உலகம் மீண்டும் சிவப்பு சிந்தனையால்தான் ஒழுங்கமைக்கப்படும் என ஆணித்தரமாக நம்புகிறவன் நான். சமகால அரசியல் நிகழ்வுகள் அருவருப்பாக இருந்தாலும் மாற்றத்திற்கான விதை இப்போது முளைவிட்டிருக்கிறது என நம்புகிறேன்.

4) உங்களின் அரசியல் பார்வைகள் பதிவுலகில் படுபிரபலம்...அதனால் இந்த கேள்வி....


தமிழ் இனம் என்ற ஒன்றை சுட்டிக்காட்டி அரசியல் செய்வது வெற்றியைக் கொடுக்குமா?

கண்டிப்பாக இல்லை. காரணம் நாம் அனைவருமே இந்தியர்கள் என்கிற மனப்பான்மை கொண்டவர்கள். மிகுந்த வேற்றுமைக்கிடையே நாம் வாழ்ந்தாலும், ஒட்டு மொத்தமாக நாம் உணர்வுப்பூர்வமாக ஒன்றிணைந்துதான் இருக்கிறோம். 

 ஆனால் ஈழம் பற்றிய பார்வையில் அங்கு நாம் இனம், மொழி சார்ந்துதான் பார்க்கவேண்டும். தமிழர்களைப் பொறுத்தவரைக்கும் சிங்கப்பூர், மலேசியா உள்ளிட்ட அனைத்து நாடுகளிலும் தங்களுக்கான சுய உரிமைகளுடன் வாழும்போது. சிங்களர்கள் ஒன்றரைகோடி பேர் இருந்துகொண்டு தமிழர்களை கொன்றுகுவித்ததை நாம் எதிர்த்துதான் ஆகவேண்டும்.


எனவே காலத்திற்கேற்ப, சூழ்நிலைகேற்ப நமது அரசியல் நிலைபாடுகளை முன்னெடுப்பதுதான் தேர்ந்த அரசியலாகும்.  

 5) பணம் என்ற விசயம் பற்றி புத்தகம் எழுதிய நீங்கள் பணம் சுத்தமாக இல்லாமல் இருந்திருக்கிறீர்களா?

அப்போது இருந்த உங்களின் மனோ நிலை என்ன?


பணம் சுத்தமாக இல்லாமல் நிறையதடவை இருந்திருக்கிறேன். ஆரம்ப காலங்களில் பதட்டம் இருக்கும். இப்போது அப்படி இல்லை. காரணம் நான் எப்போதுமே செலவு செய்யும் அளவிற்கு அதிகமாக சம்பாதிக்கும் எண்ணம் கொண்டவன், இன்றுவரை வீட்டில் பட்ஜெட் போட்டு செலவு செய்ததில்லை. கடைசி ஒரு ரூபாய் வரைக்கும் செலவழிக்கும் ஆசாமி நான். நண்பர்கள் அதிகம் என்பதால் பணப் பிரச்சினைகள் வரும்போது எளிதாக பணம் கிடைத்துவிடும்.

6) கிராமப்புற வாழ்க்கையில் வளர்ந்த நீங்கள் பட்டணத்து வாழ்க்கையை எப்படி பார்க்கிறீர்கள்?


இப்போதும் கிராமத்தானாக தான் இருக்கிறேன். ஆனால் தற்போதைய கிராமத்து இளைஞர்களை, மக்களை பார்க்கும்போது அந்த வெள்ளந்தித்தனம் இல்லாமல் இருக்கிறார்கள் . நகரத்தில் அப்படி இல்லை . இங்கு பக்கத்து வீட்டுக்காரர்கள் நமது சுதந்திரத்தில் தலையிடுவதில்லை. அதனால் இப்போது நகரத்து வாழ்க்கை என்னை ஈர்க்கவே செய்கிறது.


எதிர்காலத்தில் விவசாயம் பெரிய அளவில் செய்வதற்கான கட்டமைப்புகளை இப்போதே துவங்கியிருக்கிறேன். அப்போது மீண்டும் கிராமத்து வாழ்க்கைதான். 

7) ' ழ ' பதிப்பகம் உருவான விதம் பற்றி கொஞ்சம் சொல்லுங்களேன்?


நண்பர்கள்  ராஜா, கேபிள் சங்கர் இருவருடனும் பேசிக்கொண்டிருந்தபோது தோன்றிய எண்ணம் இது . உடனே கைவசம் தயாராக வைத்திருந்த கேபிளின் 'மீண்டும் ஒரு காதல் கதை புத்தகத்தை அச்சிட்டோம். ஆறே மாதத்தில் பெரும்பான்மை புத்தகங்கள் விற்றுவிட்டன.


அடுத்தடுத்து இந்த வருடம் நூறு புத்தகங்கள் வெளியிட திட்டமிட்டு இருக்கிறோம். இதில் விரும்பும் அனைவரையும் பங்குதாரர்களாக கொண்டு வந்து தமிழகம் முழுதும் நூறு கடைகள் திறந்து எங்கள் பதிப்பக புத்தகங்களோடு அனைத்து பதிப்பக புத்தகங்களையும் விற்க தீர்மானித்து இருக்கிறோம்.


குழந்தைகளுக்கான புத்தகங்களை வெளிநாடுகளில் இருந்து தருவித்து விற்பதற்கான ஏற்பாடுகளை செய்துகொண்டு இருக்கிறோம்.


கூடிய விரைவில் பங்குதாரர்கள் சேர்ப்பது குறித்த அறிவிப்பு வெளியாகும்.

8) புத்தகங்கள் வெளியிட என்ன மாதிரியான தர நிர்ணயம் வைத்துள்ளீர்கள்?


கதையோ, கட்டுரையோ, கவிதையோ அதனை காசு கொடுத்து வாங்கிப் படிப்பவருக்கு உபயோகமாக இருக்கவேண்டும். அவ்வளவுதான்.

9) ஒரு வலைப்பதிவர் தனது பதிவுகளை புத்தகமாக்க விரும்பினால் அவர் உங்களை அணுகலாமா? என்ன விதிமுறைகள் உள்ளன?


வலைப்பதிவர் என்னையோ, கேபிளையோ தொடர்பு கொள்ளலாம். விதிமுறைகள் பெரிதாக இருக்காது. பதிவர்கள் எழுதிய படைப்புகள் தரமாக இருந்தால் வெளியிடலாம்.  

10) அச்சிட்ட புத்தகங்களை மார்கெட் செய்யும் போது எந்த மாதிரியான புத்தகங்களுக்கு வரவேற்பு இருக்கிறது?

இப்போதைக்கு non fiction வகை புத்தகங்களுக்கு மிகுந்த வரவேற்ப்பு இருக்கிறது. ஆனால் புத்தகங்கள் சென்னை தாண்டி சில பெரிய நகரங்களை தவிர பரவலாக கிடைப்பதில்லை. பதிப்பகங்களும் ஆன்லைன் வியாபாரத்தைத்தான் விரும்புகிறார்கள். இதற்கு முக்கிய காரணம் புத்தகம் வாங்கிய கடைக்காரர்கள் அதற்கான பணத்தை ஒழுங்காக தருவதில்லை.


நாங்கள் ஆரம்பிக்கவிருக்கும் கடைகளில் இந்தக்குறை இருக்காது. புத்தகம் விற்றவுடன் அது எந்தக்கடையில் விற்கப்பட்டது, எத்தனை பிரதிகள் விற்கப்பட்டது என்கிற தகவல் பதிப்பாளருக்கு போய்விடும். ஒவ்வொரு மாதமும் முதல் தேதியன்று விற்கப்பட புத்தகங்களுக்கான பணம் பதிப்பாளருக்கு கொடுக்கப்பட்டுவிடும் என்கிற மாதிரியான விசயங்களை வைத்திருக்கிறோம்.  

11) பிஸினஸ் கன்சல்டண்ட் ஆன நீங்கள் புதிதாக தொழில் முனைய விரும்புவோருக்கு  என்ன கூற விரும்புகிறீர்கள்?


எந்தவொரு தொழிலாக இருந்தாலும் அதனைப்பற்றிய முழுமையான அறிவு இருந்தால் மட்டுமே துவங்கவேண்டும். குறைந்த முதலீட்டில் துவங்கி படிப்படியான வளர்ச்சியை அடையக்கூடிய தொழிலாக இருப்பது நல்லது. மேலும் முழுமையான அர்ப்பணிப்பு இருந்தால் மட்டுமே ஜெயிக்க முடியும்.


இந்தியா மாதிரியான தேசத்தில் உணவுக்கான தேவை மிக அதிகம், அதனால் உணவகங்களுக்கு பிரமாதமான எதிர்காலம் இருக்கிறது. 

12) சமீபத்திய தேர்தல் முடிவுகளை வைத்து மக்கள் தெளிந்திருக்கிறார்கள் என்று கருதுகிறீர்களா?


இது வேறு வழியில்லாமல் எடுத்த முடிவு. ஜெயலலிதா சரியான தேர்வு இல்லை என்றாலும் இப்போது தான் சரியான தேர்வுதான் என ஜெயலலிதா காட்ட முனைகிறார். தி.மு.க போன்ற தவறான தலைமையினால் நடத்தப்படும் கட்சிக்கு மூன்றாம் இடமும். பா.ம.க, வி.சி.க போன்ற சாதிகட்சிகளுக்கு ஆப்பும், காங்கிரசுக்கு என்று தனிப்பட்ட செல்வாக்கு எதுவும் இல்லை என்று காட்டியிருக்கிறார்கள்.


இவை எல்லாவற்றையும் பார்க்கும்போது மக்கள் தெளிவாகத்தான் இருக்கிறார்கள் என்றே தோன்றுகிறது.

13) இந்தியாவின் சாபக்கேடு என்ன? வரம் என்ன?


வரம் மக்கள் தொகை சாபமும் அதுதான்

14) உங்களின் எழுத்தை புத்தகமாக எழுத்தில் பார்த்த போது என்ன தோன்றியது?

மிகுந்த சந்தோசமாக இருந்தது. ஒரு குழந்தை பிறக்கும்போது தகப்பனுக்கு இருக்கும் சந்தோசம்தான். தன் எழுத்தை முதல் புத்தகமாக பார்க்கும் எழுத்தாளனுக்கும்.

 15) 'ழ' பதிப்பகத்தின் அடுத்த வெளீயீடுகள் என்ன? எப்போது..?

அடுத்ததாக "ஈழம் ஒரு பெண்ணின் வலி" என்ற தலைப்பிலான ரதியின் புத்தகம், மற்றும் ஆறு புத்தகங்களுக்கான வேலைகள் நடக்கிறது. ரதியின் புத்தகம் முன்னரே வெளியாகியிருக்க வேண்டியது. ஆனால் அண்ணன் 'காசி ஆனந்தன்' அவர்களின் மதிப்புரைக்காக தாமதம் ஆகிவிட்டது.


அனேகமாக ஜூலையில் இந்த புத்தகங்கள் வெளிவரும்.


கழுகு குழுமத்தாருக்கும், பதிவுலக, வாசக நண்பர்களுக்கும் எனது நெஞ்சார்ந்த நன்றிகள்..

(கழுகு இன்னும் உயரப்பறக்கும்)

Read more »

குழந்தை வளர்ப்பு - ஒரு கழுகு கண்ணோட்டம்

நமது தேசத்தின் இத்தனை முரண்களுக்கும் காரணம். இன்று வளர்ந்து நிற்கும் மனித முரண்பாடுகள். எங்கே சரி செய்ய வேண்டுமோ இந்த முரணை அங்கே நாம் சரி செய்யத் தவறி விட்டு வேர்களில் ஏற்பட்ட தவறுகளை கிளைகளில் சரி செய்ய முனைகிறோம். எமது கழுகுப் பார்வையில் குழந்தை வளர்ப்பு பற்றி வலுவாக மக்களின் மனதில் பதியச் செய்யும் படி ஒரு கட்டுரை செய்ய வேண்டும் என்ற பேரவாவை இந்த கட்டுரையை உங்களுக்குச் சமர்ப்பிப்பதின் மூலம் பெருமகிழ்ச்சி அடைகிறோம்.

 

குழந்தை வளர்ப்பு அல்லது நேற்றைய குழந்தைகளுக்கு சில ஆலோசனைகள் 

யாருக்கு அறிவுரை ?

மாறி வரும் இன்றைய சூழலுக்கு ஏற்றபடி நேற்றைய குழந்தைகளான இன்றைய பெற்றோர்களுக்கு தான் அறிவுறுத்த வேண்டியது  இருக்கிறது.

குழந்தைகள் மிகுந்த புத்திசாலிகள், கணினி யுகத்தின் வேகத்திற்கு  ஏற்ப  சிந்திக்கக்  கூடிய  ஆற்றல்  மிக்கவர்கள் . ஆனால்  அவர்களுக்கு  வழிகாட்டுகிறோம்  என்று  பெற்றோர்கள் படுத்தும் பாடு இருக்கே அப்பப்பா !! பாவம் குழந்தைகள் !! அதிக பாடசுமை, பெற்றோர்களின் அதிக எதிர்பார்ப்புகள், போட்டி உலகத்தில் தங்களை முன்னிறுத்த எடுக்கும் முயற்சிகள் அத்தனையையும் சமாளித்து வளர்ந்துக் கொண்டிருக்கிறார்கள். இச்சூழ்நிலையில் பெற்றோர்கள் அவர்களுக்கு பக்கபலமாக ஒத்துழைப்பு கொடுக்கவேண்டும். ஆனால் உண்மையில் பல வீடுகளில் என்ன நடக்கிறது......?!!

கொஞ்சம் யோசியுங்களேன் 

குழந்தைகளுடன் செலவழிக்கும் நேரங்கள் மிகக் குறைந்துவிட்டது. பொருளாதாரத் தேவைக்காகவும், வாழ்க்கை வசதியை பெருக்கவும் நிமிட முள்ளை விட வேகமாக ஓடிக் கொண்டிருக்கும் பெற்றோர்களே ஒரு நிமிடம் நிதானியுங்கள்,

உங்களின் இந்த ஓட்டம் யாருக்காக ? எதற்காக ? 

வெகு சுலபமாக சொல்வீர்கள் என் பிள்ளைகளுக்காக என்று . ஆனால் இது வெறும் சமாளிப்பு !!

முழுக்க முழுக்க உங்களின் சந்தோசத்துக்காக, பிறர் முன் கௌரமாக வாழ வேண்டும் என்ற அந்த ஆசைக்காக ! குழந்தைகளின் வசதிக்காக கார்  வாங்கினேன், வீடு கட்டினேன், இதை செய்தேன், அதை செய்தேன் என்று இனியும் சொல்லாதிங்க. எந்த குழந்தையும் எனக்கு வீடு கட்டி வையுங்கள், பேங்கில் பணம் போட்டு வையுங்கள் என்று கேட்டதா ? (சின்ன குழந்தைக்கு என்ன தெரியும் என்று அறிவு பூர்வமா பதில் சொல்ல கூடாது) வீடு,  பேங்க் பேலன்ஸ் முக்கியம் தான். ஆனால் அதற்கு மட்டும் அதிக முக்கியத்துவம் கொடுத்து வருவது நல்லது அல்ல. கண்ணுக்கு தெரியாத எதிர்காலம் என்ற ஒன்றுக்காக ஓடி ஓடி சம்பாதித்து பொருள் சேர்க்கும் நீங்கள் கண்முன் இருக்கும் நிகழ்காலத்தில் என்ன செய்கிறீர்கள்...??!

முதலில் உங்கள் குழந்தையின்  இன்றைய தேவை என்ன என அறிந்து அதை முதலில் நிறைவேற்றுங்கள். குழந்தையை அருகில் அழைத்து மெதுவாக பொறுமையாக கேட்டு பாருங்கள் ' உனக்கு என்னமா வேண்டும் என்று ' குழந்தை சொல்லும் 'என்கூட விளையாடணும்', 'என்னை வெளியே கூட்டி போங்க' !! வீட்டிற்குள் நுழையும் அப்பாவை பார்த்ததும் ஓடி வரும் குழந்தை அப்பா 'இன்னைக்கு கிளாஸ்ல ஹரிணி இல்ல அவ.....'என்று எதையோ சொல்ல ஆரம்பிக்கும் போதே 'அப்பா டியர்டா இருக்கேன்,தொந்தரவு பண்ணாத ' என்று வெறுப்பாக சொல்லாமல் ஒரு இரண்டு நிமிடம் காது கொடுத்து கேளுங்கள். அல்லது வெயிட் பண்ணு கொஞ்சம் ரிலாஸ் பண்ணிட்டு வரேன் என்று சொல்லிவிட்டு மறுபடி வந்து அவசியம் கேளுங்கள். குழந்தையும் மிகுந்த ஆர்வமாகி சொல்ல தொடங்கும். 

தன் பேச்சை பெற்றோர்கள் விரும்பி கேட்கிறார்கள் என்ற எண்ணம் அக்குழந்தையின் மனதில் ஒரு தன்னம்பிக்கையை கொடுக்கும். தவிரவும், பள்ளியில் குழந்தையின் நடவடிக்கை, ஆசிரியர்களின் அணுகுமுறைகள்  எப்படி இருக்கிறது, ஏதும் பிரச்சனைகள் ஏற்படுகிறதா என்பதையும் புரிந்து கொள்ள முடியும்.  முதலில் உங்கள் குழந்தையின் சின்ன சின்ன தேவையை நிறைவேற்றுங்கள். அப்புறம் பார்க்கலாம் வீடும் காரும்...! 

நாம் இருவர் நமக்கு ஒருவர் !

இன்று பல வீடுகளில் ஒரு குழந்தை தான், காரணம் கேட்டால் 'இத ஒன்னு வளர்த்தா போதாதா இருக்கிற விலைவாசியில' என்று பதில் வரும். ஆனால் முந்தைய தலைமுறை பெற்றோர்கள் நாலு, ஐந்து குழந்தைகளை பெற்றார்கள், படிக்க வைத்தார்கள், திருமணம் முடித்து கொடுத்தார்கள் !! அன்றைய விலைவாசிக்கு தக்கதாகத்தான் அப்போதைய அப்பாக்களின் சம்பளமும் இருந்தது. பின் அவர்களுக்கு எப்படி சாத்தியமாயிற்று ? காரணம் அவர்களிடம் தேவைக்கு மீறிய ஆசைகள், ஆடம்பரம், போட்டி மனப்பான்மை இல்லை. முக்கியமாக வாழ்க்கை வசதியைப் பெருக்க அவசரம் காட்டவில்லை . ஒவ்வொரு செயலையும் நிதானித்துத் தீர்மானித்தார்கள். இப்போது கணினிகாலம் அதற்கு ஈடு கொடுத்து ஓடி கொண்டிருக்கிறோம். 

தவறில்லை ஆனால் இந்த ஓட்டத்தை சற்று நிறுத்தி குழந்தைகளுடன் சிறிது நேரம் செலவழியுங்கள். அந்த நேரங்கள் வானவில் நிமிடங்கள் ரசிக்க/பார்க்க  தவறிவிட்டோம் என்றால் க்ஷண நேரத்தில் மறைந்து விடும்.

நாம்  மாறுவோம்

*  தாத்தா, பாட்டி, சித்தப்பா, சித்தி, பெரியம்மா, பெரியப்பா, மாமா, அத்தை போன்ற உறவுகளின் பெயர்கள் மறந்து/மறைந்து வருகிற காலம் இது. வீட்டுக்கு ஒரு பிள்ளை என்ற நிலையில் அடுத்த தலைமுறையினருக்கு இந்த உறவுகள் கூட இல்லாமல் போகலாம் !! அதனால் விடுமுறை நாட்களில் பார்க், பீச் , சினிமா என்று போவதை விட உறவினர்களின் இல்லத்திற்கு அழைத்து செல்லலாம். அவர்களை நம் வீட்டிற்கு வரவழைக்கலாம். சிறு சிறு மனஸ்தாபங்கள் இருந்தாலும் நம் குழந்தைகளுக்காக அதை மறந்து உறவுகளின் உன்னதத்தை உணர்த்தலாம். நம்மை பார்த்து நம் குழந்தைகள் கற்றுக் கொள்ளட்டும்.

*  தொலைகாட்சி பார்க்காதே என்று சொல்வதற்கு பின்னால் சீரியல் பார்க்க முடியாமல் போய்விட்டதே என்ற ஆதங்கம் இருப்பதாகத்தான் தோன்றுகிறது. பார்க்க அனுமதியுங்கள். டிஸ்கவரி, ஜியாக்கிரபி போன்ற சேனல்கள் பார்க்கட்டும். கார்ட்டூன்(சில தவிர்த்து) பார்ப்பதால் என்ன பாதிப்பு வந்துவிட போகிறது...? அதற்கு ஒரு குறிப்பிட்ட நேரம் ஒதுக்கி பார்க்க செய்யுங்கள். இயன்றால் அவர்களுடன் அவற்றை சிறிது நேரம் நீங்களும் பாருங்கள் இவ்வாறு செய்வதின் மூலம் நமது மன அழுத்தம் குறைந்து குழந்தைகளுடன் குழந்தையாக மாறி விடுவோம். அவர்களும் ரிலாக்சாக பீல் பண்ணுவார்கள்.

*  கல்வி தொடர்பான டிவிடிக்களை போட்டு பார்த்தால் குழந்தைகள் விரைவாக அந்த பாடங்களை கிரகித்து கொள்வார்கள் என்று நாம் எண்ணுவோம், ஆனால் இப்படி திரைகளை பார்த்து தெரிந்து கொள்வதைவிட மற்றவர்களுடன் பேசி பழகும் குழந்தைகளின் மூளை சுறுசுறுப்பாக இயங்குகிறது, விரைவாக எதையும் கற்றுக் கொள்கிறார்கள்  என்று ஆய்வு சொல்கிறது. அதனால் அக்கம் பக்கம் குழந்தைகளுடன் ஒரு ஆரோக்கியமான நட்பை ஏற்படுத்தி கொடுங்கள். நன்கு விளையாடட்டும், பேசி பழகட்டும்.

*  உடலுக்கு பயிற்சி தரக்கூடிய ஷட்டில் காக் , ரிங் பால், ஸ்கிப்பிங், த்ரோ பால்  போன்ற விளையாட்டுகளை அவர்களுடன் இணைந்து விளையாடுங்கள், அவர்களை விளையாட உற்சாகபடுத்துங்கள்.

*  இப்போதுள்ள குழந்தைகளின் முக்கிய பிரச்சனை ஞாபக மறதி, இதற்கு ஒரு எளிய வழியாக பகல் நேர தூக்கத்தை சொல்கிறார்கள் வல்லுனர்கள். தூங்கி எழுந்தபின் செய்யும் எந்த வேலையும் அல்லது எதையும் கற்றுகொண்டால் அது எளிதாக மூளையில் பதியும். விடுமுறை நாட்களில் முடிந்த வரை பகலில் சிறிது நேரம் தூங்க வைத்து பழக்குங்கள். 

*  சில அம்மாக்கள் தங்கள்  குழந்தைகளை காப்பாற்றுவதாக எண்ணி குழந்தைகளின் சில தவறுகளை கணவரிடம் மறைப்பார்கள். இது தவறான வளர்ப்பு முறை. அவ்வாறு செய்யும் போது அம்மா ஒண்ணும் சொல்ல மாட்டாங்க, அம்மாவை எப்படியும் சமாளித்து விடலாம் என்று துணிச்சலாக தவறுகளை செய்ய தொடங்குவார்கள்.  

*  சில வீடுகளில் கணவனுக்கு தெரியாமல் மனைவியும், மனைவிக்கு தெரியாமல் கணவனும் தங்கள் குழந்தைகளுக்கு பொருட்களை வாங்கி கொடுப்பார்கள். இதுவும் சரியன்று. எதுவாக இருந்தாலும் இருவரும் இணைந்தே, இருவரின் விருப்பத்தின் பெயரிலேயே குழந்தைகளுக்கான பொருட்கள் வாங்கப்பட வேண்டும். 

*  சிலர் கண்டிப்பதில் ஒரு கொள்கையை வைத்திருப்பார்கள், அதாவது குழந்தை ஒரு தவறை செய்து விட்டால் ஒருவர்(அப்பா) கண்டிக்க வேண்டும் என்றும் மற்றொருவர்(அம்மா)  சமாதானம் படுத்தணும் என்றும்...! ஆனால் இதில் ஒரு சிக்கல் இருக்கிறது...அப்பாவிற்கு தவறாக படுவது அம்மாவிற்கு சாதாரணமாக  படுகிறதே என்று குழந்தை கொஞ்சம் குழம்பி யோசிக்க ஆரம்பித்துவிடும். தவறு என்றால் இருவருக்கும் தவறுதான். இருவரும் கண்டிக்க வேண்டும். 

*  பொதுவாக ஒரு குழந்தையிடம் பலரும் சகஜமாக கேட்கும் கேள்வி உனக்கு அம்மா பிடிக்குமா ? அப்பா பிடிக்குமா ? உண்மையில் இந்த கேள்வியே அபத்தம். அம்மா, அப்பா இருவரும் வேறு வேறு அல்ல, இருவரும் ஒருவரே...இருவருக்கும் சம அளவில் மரியாதையும், அன்பும் கொடுக்கப்பட வேண்டும். இதை முதலில் குழந்தைக்கு புரிய வைக்க வேண்டும். 

குழந்தைகளை குழந்தையாக எண்ணி நடந்து கொண்டாலே போதும். வயதிற்கு மீறிய எதிர்பார்ப்பை அவர்கள் மீது திணிக்காமல் இருங்கள். அவர்களுக்கு வழியை மட்டும் காட்டுங்கள், கூடவே செல்ல வேண்டும் என்பது தேவை இல்லை. 

கழுகிற்காக

கௌசல்யா  


(கழுகு இன்னும் உயரப்பறக்கும்)

Read more »