பஞ்ச்' சாமிர்தம்.....நிஜமாவே இனிக்கும் (16.6.2011)

பஞ்ச் 1

ஆஸ்பத்திரியிலிருந்து டிஸ்சார்ஜ் ஆன கையோடு முதல்வருக்கு தொலை பேசியில் வாழ்த்து தெரிவித்திருக்கிறார் சூப்பர் ஸ்டார். 15 வருசத்திற்கு  முன்னால தமிழ் நாட்ல ஜெயலலிதா ஆட்சிக்கு வந்தா...  தமிழகத்தை ஆண்டவனாலயும் காப்பத்த முடியாதுன்னு சொன்ன அதே ரஜினி இன்னிக்கு அம்மையார் ஆட்சிக்கு வந்ததால தமிழகத்தை ஆண்டவன் காப்பாத்திட்டார்னு சொல்லியிருக்கார். 

இதே நேரம் கலைஞர் கருணாநிதியோடும் சகஜமான ஒரு தொடர்பிலும் இருக்கிறார் சூப்பர் ஸ்டார். நிம்மதியா வாழணும்னா எல்லோரையும் அட்ஜஸ்ட் பண்ணித்தான் வாழணும் அப்டீங்கிற சூத்திரத்தை சொல்லாம சொல்லியிருக்கிறார்.

தமிழகத்தை காப்பாத்தினது எல்லாம் பொறவு சார்.. உங்களை காப்பாத்திய ஆண்டவனுக்கு முதல்ல நன்றி சொல்லுங்க..! சீக்கிரம் வாங்க!

பஞ்ச் 2

புதிய அரசு பழைய செயின்ட் ஜார்ஜ் கோட்டையிலேயே இயங்கலாம்னு கோர்ட்டு தீர்ப்பு சொல்லிடுச்சு மேலும் தமிழக அரசின் கொள்கை முடிவுகளை கட்டுப்படுத்த முடியாதுன்னும் சொல்லியிருக்கு...! சரி ரைட்டு  இப்ப ரெண்டு கேள்வி எழுது மனசுல...

1) இது தமிழக அரசின் கொள்கை முடிவா? இல்லை அ.தி.மு.க என்னும் கட்சியின் கொள்கை முடிவா?

2) நிஜமாவே புது கோட்டை ரெடியாயிருக்கா இல்லையான்னு ஏன் நீதி மன்றம் ஒரு குழுவை அமைச்சு செக் பண்ணிட்டு தீர்ப்பு சொல்லக்கூடாது...(ஓ.. குழு செக் பண்ணி சொல்றதுக்குள்ள 5 வருசம் முடிஞ்சுடும்னு சொல்றீங்களா...சரி விட்டுத்தள்ளுங்க பாஸ்...!!!)

பஞ்ச் 3

2 ஜி ஸ்பெக்ட்ரம் ஊழல்ல எனக்கு எந்த தொடர்பும் இல்லைனு மத்திய அமைச்சர் ப. சிதம்பரம் ரொமப நேர்மையா சொல்லியிருக்காங்க..! அதை எல்லாம் யாரு சார் கேட்டா... விட்டுத்தள்ளுங்க....முதல்ல நீங்க பாராளுமன்றத் தேர்தல்ல ஜெயிக்கவே இல்லனு பேசிக்கிறாங்களே..அதைப் பத்தி கொஞ்சம் விளக்குறீங்களா?ன்னு தான் கேக்க மனசு துடிக்குது.

அநியாயத்துக்கு  நல்லவன் வேசம் போட்டுகிட்டு எப்டி சார் காங்கிரஸ் கட்சில இருக்கீங்க...? சார் தமிழ் நாடு இல்ல.. வெளிநாடு போல...!

பஞ்ச் 4

சானல் 4 வெளியிட்டு இருக்கிற வீடியோக்களை பார்த்து அதிர்ந்து போயிருக்கிறது உலக சமுதாயம். இது சம்பந்தமான வீடியோக்களை தமிழகத்தின் பட்டி தொட்டியெல்லாம் பரப்ப வேண்டும். இயன்ற வரை எல்லோருக்கும் போய் ரீச் ஆகணும். ரீச் ஆகறதோட மட்டும் இல்லாம, காங்கிரஸ் கட்சியின் கைகள் இந்தியாவின் பேரைச் சொல்லி எவ்ளோ அட்டூழியம் பண்ணியிருக்குன்னும் சொல்லணும்.

நியாயம் பேசுற இந்திய தேசத்து அரசியல்வாதிகளும், பொது நல விரும்பிகளும் இதை எல்லாம் பாத்துட்டு என்ன பண்ண  போறாங்க?  வட நாட்ல இருக்குற் மீடியாஸ் எல்லாம் இந்தியாவைச் சேர்ந்த மீடியாஸ் தானா? இல்லை ஒன்லி ஃபார் வட இந்தியாவுக்கா?

அடச்சே....என்ன சொல்லிட்டு இருக்கேன்....நீங்க இடையில தமிழக தனியார் தொலைக்காட்சிகள் பத்தி கேக்குறீங்க........?????இவனுக எல்லாம் டி.வி வச்சு இருக்கறது தங்கள் கட்சிகளை வளர்க்க சார்....உண்மையை சொல்ல கிடையாது...! ப்ளீஸ்...ஸ்கிப் திஸ் புல்லுருவிகள் பாஸ்!

பஞ்ச் 5

இந்த சமச்சீர் கல்வி திட்டத்துல என்ன பிரச்சினை?  இதுக்கு பின்னால் என்ன அரசியல் இருக்குன்னு எல்லாம் நம்ம மாதிரி சாதாரண மக்கள் தெரிஞ்சுக்க வேண்டிய அவசியம் இல்லை, ஆனா என்ன புண்ணாக்கு இருந்தாலும் எங்க வீட்டு பிள்ளைகள் படிப்புலயா ராசா இந்த விளையாட்டை எல்லாம் அரசியல்வாதிங்க எல்லாம் நடத்தனும்.

கல்விக்கும் அதை திட்டமிடுவதற்கும், செயல்படுத்துவதற்கும் அரசியல்வாதிகள் இல்லாத ஒரு தனி அமைப்பு தேர்தல் ஆணையம் மாதிரி வைக்க முடியாதுங்களா? பள்ளிக்கூடம் தொறந்தும் என்ன பாடத்திட்டம்னு தெரியாம இருக்குற புள்ளைகள பாத்தா பாவமா தெரியலையா சாமி?

ஸ்ட்ரெய்ட்டா நாட்டோட எதிர்காலங்கள் மேல சுடு தண்ணி ஊத்துறீங்களே.... என்ன நியாயம் இது?

(கழுகு இன்னும் உயரப்பறக்கும்)

Read more »

நேர்மறை எண்ணங்களின் வலிமை...! ஒரு தன்னம்பிக்கை பார்வை!

எனக்குள் திறன் இருக்கிறது! எனக்குள் திறன் இருக்கிறது..! எனக்குள் திறன் இருக்கிறது...! நான் சக்தி மிகுந்தவன்! நான் சக்தி மிகுந்தவன்! நான் சக்தி மிகுந்தவன்...! என்னிடம் நேர்மறையான அதிர்வலைகள் இருக்கின்றன.....!

என் பார்வையின் மிகுதியில் சிக்குவது எல்லாம் பாஸிட்டிவான விசயங்கள்..மட்டுமே...! எல்லா சூழ்நிலைகளுக்கும் தீர்வினை எட்டும் தீர்க்க முடிவுகள் மட்டுமே நான் எடுக்கிறேன் கூறுகிறேன்!

மனிதர்களை குழப்பத்தில் ஆழ்த்தும் விசயங்களையும் சிக்கலை கொடுக்கும் விசயங்களையும் எப்போதும் சொல்வதை தவிர்க்கிறேன். என்னிடமிருந்து வாழ்த்துக்களும், பரஸ்பரம் அன்பும், விசாரிப்புகளும் அலைகளைப் போல பரவிக் கொண்டே இருக்கின்ற. ஒரு புல் பிளேட் பிரியாணி சாப்பிடும் ஆசையில் என் கண்ணெதிரில் இருக்கும் கஞ்சியையும், கருவாட்டுத் தொக்கையும் ருசிக்க மறக்கும் முட்டாள் மனிதனல்ல நான்....!

ஊரின் விடியலுக்கு போராடக்கூடிய பெரிய செயல்கள் செய்ய முடியாவிட்டாலும் ஒரு மண் பானை வாங்கி நீர் ஊற்றி வீட்டுக்கு வெளியே தெருவில் வந்து செல்லக்கூடிய மனிதர்களின் தாகம் தணிக்க வைக்கும் அளவிற்கு திறனுள்ளவன்தான்......... நான்.......!

என்ன மக்கா.. அப்படியே கட்டுரைக்குள்ளே போய்ட்டீங்களா...? சரி வெளில வாங்க இப்போ நாம உக்காந்து பேசுவோம். மேலே சொன்ன மாதிரி தினமும் மனசுக்குள்ளே சொல்லிகிட்டே இருந்த நேர்மறையான எண்ணங்கள் நமக்குள்ளே ஆட்டோமேட்டிகா வரும்னு சொல்றாங்க....அது எப்டிப்பா வரும்.. மாயமா மந்திரமா..? 
இங்கே கவனியுங்கள்

எதை வலுவாக திரும்ப திரும்ப சொல்லிக் கொண்டு இருக்கிறோமோ அது உண்மை என்று மனது நம்புகிறது. மேலும் மனம் முடிவு செய்யும் தீர்மானமான முடிவுகள்தான் செயலாக மாறுகிறது. உதாரணமாக பக்கத்தில் இருக்கும் பெட்டிக்கடைக்கு சென்று வாழைப்பழம் வாங்கவேண்டும் என்று நாம் முதலில் நினைக்கிறோம்.

வெறுமனே முதலில் நினைப்பது மனதில் நிகழ்கிறது. அது தீர்மானமான பின்னால்...கடைக்கு சென்று வாழைப்பழம் வாங்கி வருகிறோம். ஸ்தூலமான இந்த உடலை மனதில் தோன்றும் சூட்சுமமான தீர்க்கமான எண்ணம்தானே வழி நடத்துகிறது.

அப்படித்தான் திரும்ப திரும்ப எதை நம்பிறோமோ (தீர்க்கமாக) அதை வாங்கிக் கொள்ளும் ஆழ் மனது...அதை ஒரு கட்டத்தில் செயல்படவைக்கிறது. அதாவது நாமே அதை செய்கிறோம். நாம் செய்ய வேண்டியதை பெரும்பாலும் செய்யாமல் காலத்தையும் நேரத்தையும் குறை சொல்லிக் கொண்டே இருக்கிறோம். இப்போதிருக்கும் நமது நிலைக்கு காலம் கடந்த காலத்து நமது செயல்கள்தான் காரணம்....என்பதில் எந்த மாற்றமும் இருக்க முடியாது. அப்படி என்றால் நமது எதிர்காலத்தை தீர்மானிக்கபோவது எது? நம்து நிகழ்காலத்து செயல்கள்தானே....?

நிகழ் காலத்தில் என்ன செய்து கொண்டிருக்கிறோம்.. தட்ஸ் த மில்லையன் டாலர் கொஸ்ஸின்?

புறச்சூழ்நிலை, பணவசதி, நமது பிரச்சினைகள் எல்லாம் ஒரு மாயை....அதிலிருந்து நமது கன்ஸ்டரக்டிவான ம்ம்ம்ம் தொடர்ச்சியான பாஸிட்டிவ் செயல்கள் மூலம் வெளி வர முடியும் என்று தான் சொல்கிறார்கள். ஒரு விசயத்தை எடுத்துப் பார்த்தால் வெற்றி பெற்றவர்களுக்கு எல்லாம் ஒரே ஃபார்முலாதான் இருந்திருக்கிறது. அவர்கள் எப்போதும் தங்களின் செயல்களிலும் நேரத்திலும் கவனம் வைத்திருந்ததோடு மற்ற மனிதர்களின் நிறையை பற்றி மட்டுமே பேசி இருக்கிறார்கள்.

என்னிடம் நண்பர் ஒருவர் கேட்டார்... நீ நிலையாமை பற்றியே நிறைய பேசுகிறாய்.... உடல் பொய்..எல்லாம் மாயை என்று அடிக்கடி சொல்கிறாய் நீ எப்படி நேர்மறை சிந்தனை உடையவனாவாய் என்று.....

சரி நிலையாமை பற்றி பேசுவதும் நேர்மறை என்பதை நண்பர் அறிந்திருக்கவில்லை... !
நிலையாமை உணர்ந்தால் கர்வம் போகும். கர்வம் இல்லை என்றால் அன்பு பெருகும். அன்பு பெருகிறானால் செய்யும் செயல்களில் ஈடுபாடு அதிகரிக்கும். ஈடுபாடு அதிகரித்தால்... புரடக்டிவிட்டி என்னும் உற்பத்தி திறன் அதிகரிக்கும்.

உற்பத்தி திறன் அதிகரித்தால்... லாபம் கிடைக்கும். லாபத்தினால் பொருள் கிடைக்கும். பொருளினால் இம்மை வாழ்க்கை அல்லது இந்த லெளகீக வாழ்க்கையின் தேவைகளை பூர்த்தி செய்ய முடியும். உடல்சார் தேவைகளும் சுற்றங்களின் தேவைகளும் பூர்த்தி செய்யப்படும் போதும் மனம்.. அடுத்து என்ன என்று ஆராயும் அங்கே.... நமக்கு தேவையான அல்லது எப்போதும் உண்மையான பேருண்மை வெளிப்படும்....இப்போ சொல்லுங்க... நிலையாமை எப்படி எதிர்மறையை போதிக்கும்....அது நேர்மறையின் நிழல்தானே....?

நேர்மறயான எண்ணம் இருந்ததால்தனே... ரூஸ்வெல்ட்.. சக்கர நாற்காலியில் அமர்ந்து கொண்டு அமெரிக்க ஜனாதிபதியாயிருந்தார்?

நேர்மறையான எண்ணம் இருந்ததால் தானே.. .மகாத்மா காந்தி.... நாம் சுவாசிக்கும் சுதந்திர காற்றினை நமக்கு கொடுத்தார்...

மொத்த ஆய்வுக் கூடமும் எறிந்த போது எடிசன் கவலைப்படவில்லை....என் தவறுகள் எரிந்து கொண்டிருக்கின்றன என்றார்...! அந்த நேர்மறைப் பார்வைதானே....இன்று எல்லோருடைய வாழ்க்கையிலும் வெளிச்சம் கொடுத்திருக்கிறது...

வலைப்பூக்களிலும், இணையங்களிலும் மிகுதியாக நிறைந்திருப்பது.....இளைஞர்கள். இளைய இந்தியா.. இன்று குழுமியிருக்கும் இடம்.. இணையம்.....! இதன் பயன்பாடுகள் நேர்மறையாகவும்... பயனுள்ள வகையிலும்...சக்தி மிகுந்ததாகவும் மாற....மிகுதியான விழிப்புணர்வு தேவைப்படுகிறது.

இங்கே... எழுத்துரிமை, பேச்சுரிமை, சமூகக் கூட்டுறவு என்று எல்லாமே இருக்கிறது.. ! கண்ணிமைக்கும் நேரத்தில் உலக செயல் பாடுகள்.. மனித மூளைகளின் கவனித்திற்கு வந்து விடுகிறது ஆனால் அணுகும் முறைக்கும், பயன்பாடுகள் பற்றிய தெளிவுக்கும் நேர்மறையான சக்தி மிகுந்த பார்வை தேவைப்படுகிறது.

நேர்மறையான ஒரு பாசிட்டிவ் அவுட் லுக் என் தேசத்து இளைஞனின் உடனடித் தேவை! இயன்ற வரை அரசும்..., தன்னார்வத் தொண்டு நிறுவனங்களும், சமூக நல் நோக்கு ஆர்வலர்களும்..இது பற்றிய விழிப்புணர்வினை விதைத்துக் கொண்டே இருக்க வேண்டும்...!!!

IF WE ARE NOT PART OF THE SOLUTION, THEN WE ARE THE PROBLEM!!!!

Read more »

கடன்.. என்னும் மந்திரம்...! ஒரு விழிப்புணர்வு பார்வை!

 கடன் வாங்காமல் இப்போதுள்ள சூழ்நிலையில் வாழ்க்கையை நகர்த்துதல் என்பது குதிரைக் கொம்பான விசயம்தான். காலமும், சூழலும், விலைவாசி ஏற்றமும் சேர்ந்து மனிதர்களை ஒரு நிர்ப்பந்தத்திற்கு ஆளாக்கியிருப்பதை யாரும் மறுப்பதற்கில்லை. கடன் வாங்கும் போதே அதை திருப்பிச் செலுத்துவதற்கான திட்டமும் மனிதர்களுக்கு இருக்குமெனில் சூழ்நிலைகளை சிக்கலின்றி சமாளித்தல் மிகவும் எளிது.

கடன் வாங்குதல், மற்றும் கொடுத்தல் பற்றிய நிறைய விழிப்புணர்வு கட்டுரைகளை நாம் வெளியிடத் திட்டமிட்டிருக்கிறோம். அதன் முதல் படியாக இந்த கட்டுரையை உங்களின் பார்வைக்குச் சமர்ப்பிக்கிறோம்.

தன் தகுதிக்கு மீறிய… அதே சமயத்தில், அத்தியாவசியத் தேவையன்றி, அதிக வட்டிக்கு, அவசரத்திற்குப் பணம் வாங்குதல், ஆபத்தையே விளைவிக்கும் என்பதற்கு, அன்றாட தினசரிகளில் வரும், ”கடன் தொல்லையால் குடும்பத்தோடு தற்கொலை” போன்ற செய்திகளே போதும் இதனை விளக்குவதற்கு. பெரும்பாலும் அண்டை மாநிலங்களில் இருந்தே வருகிறார்கள் இந்த மாதிரியான கடன் கொடுக்கும் மைக்ரோஃபைனான்ஸ் கம்பெனி முதலாளிகள். இவர்கள் குறிவைத்து செயல்படும் நபர்கள் பெரும்பாலும் சிறுவியாபாரிகளும், கிரமங்களில் இயங்கும் ஒரு சில மகளிர் குழுக்களும், ஆட்டோ டிரைவர்கள் போன்ற எளிய மக்களே…

இவர்கள் கடன் கொடுக்கும் விதமும் அதை வசூலிக்கும் முறையும் மிகவும் கறாராக இருக்கும். ஆனால், அதே சமயத்தில் கடன் கொடுப்பதற்கு முன்பு, இந்த கம்பெனிகளின் கீழ் வேலை பார்க்கும் ஃபீல்ட் ஆஃபிஸர்கள் எனப்படும் இந்த நபர்கள், நம்மவர்களை அணுகும் முறையே வித்தியாசமாக இருக்கும். மிகவும் அன்பாகவும், நம்மவர்களின் வாழ்கை சிறப்பதற்கே இவர்கள் அவதாரம் எடுத்தவர்கள் போன்றும்  பேசி மயக்குவார்கள்.

பெரும்பாலும் இவர்களின் டார்கெட்டாய் இருப்பது, வட்டி விகிதத்தை சரியாக புரிந்து கொள்ளாதவர்களும், எவ்வளவு கட்ட வேண்டும் என சரிவர கணக்கிடத் தெரியாதவர்களும், வங்கிக் கணக்கு முறைகள் பற்றி அதிகம் தெரியாதவர்களுமாகவே இருப்பர்.

சரி, இப்பொழுது இவர்கள் கடன் வழங்கும் முறையைப் பார்ப்போம். கடன் கொடுக்கும் போதே 10 முதல் 20 சதவிகிதம் வரை பிடித்துக் கொள்வார்கள். அத்தோடு மட்டுமில்லாமல் processing fees, insurance, field officers commission  என்று பல்வேறு காரணங்களைக் கூறி, அதற்கும் ஒரு கணிசமான தொகையைப் பிடித்துக் கொள்வார்கள். இவ்வளவோடு விடுவார்களா, என பார்த்தால் இல்லை, கடன் கேட்கும் நபர் இதுவரை வங்கிக் கணக்கு வைத்திருக்கவில்லையெனில், இவர்கள் கை காட்டும் வங்கியில் புதிதாக வங்கிக் கணக்கு ஒன்றை ஆரம்பிக்க வேண்டும். அதோடு 12/24 வெற்றுக் காசோலைகளிலும் கையெழுத்துப் போட்டுக் கொடுக்க வேண்டும்.

மாதமாதம் வந்து கறாராக கடனை வசூலித்து விட்டு செல்வார்கள். ஒருவேளை கடன் வாங்கிய நபர் கொடுக்கத் தவறும் பட்சத்தில், அவர்கள் ஏற்கனவே வசூலித்த அந்த வெற்றுக் காசோலைகளை, இவர்கள் கட்ட வேண்டிய அந்த குறிப்பிட்ட தொகையை நிரப்பி, சம்பந்தப்பட்ட வங்கிக்கு அனுப்பி விடுவார்கள். அங்கேயும் எப்படி நம்மவர்களின் கணக்கில் பணம் இருக்கும்?. இருந்தால் தான் இவர்கள் கேட்கும் போதே கட்டியிருக்கலாமே… ஸோ, அந்த கம்பெனி இவர்கள் பேரில் வாங்கிக் கொண்ட காசோலையும் பவுன்ஸ் ஆகிவிடுவதோடு மட்டுமில்லாமல், அபராதத் தொகையோடு நம் வீடு நோக்கித் திரும்பி வரும். சமயத்தில் இந்த வகையில் கடன் கொடுக்கும் முதலாளிகளுக்கு அடியாட்களும் இருப்பர். எனவே இவர்களைப் பற்றி வெளியே எங்கும் போய் சொல்ல முடியாது. வெற்றுக் காசோலை மிரட்டலும், அடியாட்கள் மிரட்டலும் சேர்ந்து கடன் வாங்கியவரின் கழுத்தை நெறித்து விடும்.

எனவே எனதருமை மக்களே, இதைப் போன்ற நபர்களிடம் கடன் வாங்குவதற்கு முன்பாக சிந்தியுங்கள் இது அத்தியாவசியம் தானா என்று. அவசரத்திற்காக என்று கடன் வாங்கி விட்டு பெரும் அவதிக்கு உள்ளாகாதீர்கள்.

இதற்காக தகுந்த ஆலோசகர்களையும், அதிகாரிகளையும் அணுகிக் கேட்ட போது, அவர்களின் மீது புகார் மனு ஒன்றை எழுதிக் கொடுங்கள், தக்க நடவடிக்கை எடுக்கப் படும் என்றும், பெரும்பாலும் இத்தகையவர்களிடம் சென்று கடன் வாங்குவதைத் தவிர்க்க வேண்டும் என்பதே இவர்களின் அறிவுரையாக இருக்கிறது.

முறைகேடு செய்பவர்களைப் பற்றி வெளிச்சம் காட்டி சொல்லும் அதே வேளையில், மக்களே… ”சேமிப்பு” என்னும் வார்த்தையைத் தாரக மந்திரமாகக் கொள்ளுங்கள். அது 10 ரூபாயாகவே இருப்பினும், சேமிக்க வேண்டும் என்ற ஒழுக்கத்தையும் வளர்த்துக் கொள்ளுங்கள், என்பதையும் சொல்ல கடமைப் பட்டிருக்கிறோம். இதனோடு சரியான திட்டமிடுதலும் அவசியமாகிறது.

நம் முன்னோர்கள், நாம் சிறுபிள்ளையாய் இருக்கும் போது, ஒரு சிறிய உண்டியல் ஒன்றை வாங்கிக் கொடுத்து சேமிக்க கற்றுக் கொடுப்பார்கள். அதில் உள்ளது சூட்சுமம். ஏன் பெரியவர்களாய் ஆனதும் நாம் சேமிப்பை மறந்து விடுகிறோம்? குறைந்த வருமானமே உடையவராயினும், ஆரம்பத்திலிருந்தே சிறிது அளவேனும் சேமிக்க வேண்டும். சிறுதுளி பெரு வெள்ளமென அந்த தொகை ஒரு நாள் உங்களுக்கு உதவிடும். அதிக கடன் இன்றி, வாழும் நிம்மதியே சிறந்த  செல்வம். சேமிப்பு என்பதும் ஒருவகையான ஒழுக்கமே. நாம் நம் பிள்ளைகளுக்கு சொத்து சேர்த்து வைக்கவில்லை என்றாலும், குறைந்த பட்சம் அவர்களுக்கு கடன் சுமையைக் கொடுக்காதவாறு பார்த்துக் கொள்வோம். சேமிக்கும் பழக்கத்தை ஏற்படுத்திக் கொண்டு, அநாவசியமாய், அதிக வட்டிக்குக் கடன் வாங்கும் பழக்கதை ஒழித்து, கடனின்றி மன சாந்தியுடன் வாழ்வோம்

கழுகிற்காக

 மகேஷ்வரி

 

(கழுகு இன்னும் உயரப்பறக்கும்)

Read more »

ஜூன் 6 ல் மேட்டூர் அணை திறப்பு - சாதனையா? வேதனையா?

நாட்டில் எத்தனையோ நிகழ்வுகள் நிகழுகின்றன. நாமும் அவற்றை செய்திகளாய் வாசித்து விட்டு சென்று விடுகிறோம். நமது வாழ்வோடு பின்னிப் பிணைந்த ஓராயிரம் விசயங்களை எல்லாம் மேம்போக்காகவே மேய்ந்து விட்டு சரி அல்லது தவறு என்ற ஒரு கூற்றினை மனதில் தேக்கிக் கொண்டு அன்றாடத்தில் கரைந்து விடுகிறோம்.

சுற்றி நிகழும் நிகழ்வுகளின் மூலம், ஆழமும் நுணுக்கங்களும் அறியும் போது நமக்கே திகைப்பு வருகிறது. இது எப்படி எல்லாம் நம்மையும் நமது சமுதாயத்தையும் சீர்குலைக்குறது என்று எண்ணும் போது மலைப்பு வருகிறது.

அரசு உத்தரவின் பேரில் சமீபத்தில் திறந்து விடப்பட்ட மேட்டூர் அணையினால்.. என்ன விதமான விளைவுகள் இருக்கும் என்று இந்த கட்டுரையினூடே பயணிக்கும் போது விளங்கிக்கொள்ளலாம்...!

நம்ம நாட்டுல, குறிப்பா தமிழகத்துல ஏதாவது ஒரு துறை சம்பந்தமான முக்கிய முடிவு எடுக்கனும்னா, அந்தந்த துறைகளில் உள்ள சிலரிடம் கருத்து கேட்டு, அதுல அரசாங்கத்தோட பொருளாதார நிலைமை, ஆட்சியாளர்களின் கொள்கைகளுக்கு (அதாங்க..! அவங்களோட விருப்பு வெறுப்பு தான்) ஏற்ப.. இத்தத்தண்டியாவது அந்த துறை சார்ந்தவர்களுக்கு பலன் இருக்கறா மாதிரி திட்டத்தை செயல்படுத்துவாங்க.

ஆனா இந்த ஒரு சின்ன பாக்கியம் கூட விவசாயத்துறையில் சம்பந்தப்பட்ட(!) விவசாயிகளுக்கு கிடையாது. விவசாயம் சம்பந்தமா ஒரு முடிவு எடுக்கணும்னா... முதல்வர் அமைச்சர கூப்புடுவாரு.., அவர் ஐஏஎஸ் ஆபீசர கூட்டிட்டு வருவாரு. மூணுபேரும் ஏசி ரூம்ல உக்காந்து பேசி ஒரு அறிக்கையை தயார் செய்து எல்லா பத்திரிகை அலுவலகங்களுக்கும் ஃபேக்ஸ் அனுப்பிடுவாங்க...!!!

மறுநாள் காலைல பேப்பர பார்த்து தான் விவசாயிகளுக்கு அந்த விஷயம் தெரியவரும். அத படிச்சதும் பல சமயங்கள்ல "லூசுப் பயலுங்க" ன்னு முணுமுணுத்துக்கிட்டே போய்டுவாங்க. சில சமயங்கள்ல "யாரக்கேட்டு இப்படி செஞ்சானுங்க?" ன்னு கொஞ்சம் கோபமா திட்டிட்டே போவாங்க. சில சமயங்கள்ல தான் "பரவால்லியே நம்ம கஷ்டமும் அவங்களுக்கு கொஞ்சம் புரியுதே" ன்னு சொல்லிட்டு போவாங்க.

தமிழகத்தில் புதிதாக பதவி ஏற்றிருக்கும் அதிமுக அரசு, விவசாயிகள் சம்பந்தமா இதேப்போல ஒரு அறிக்கையை வெளியிட்டு அதை செயல்படுத்தவும் ஆரம்பித்து விட்டார்கள். "தமிழக விவசாயிகள் வரலாற்றிலேயே முதன் முறையாக...!!!" என்கிற அளவிற்கு அதற்கு விளம்பரப்படுத்தப் பட்டு செயல்படுத்தப்பட்ட விஷயம் இது தான்:

''காவிரி டெல்டா விவசாயிகளின் நலன் கருதி, சுதந்திர இந்தியாவில் எந்த தமிழக முதல்வரும் செய்திராத சாதனையாக இந்த வருடம் ஜூன் 6 ஆம் தேதியே மேட்டூர் அணை திறக்கப்படுகிறது'' - இது தான் அந்த அறிக்கையின் சாராம்சம். இதன் காரணமாக மோட்டார் பம்ப் செட் இல்லாத குறு விவசாயிகள் கூட இரண்டு போகமும் பயிர்செய்து, இந்த வருடம் அதிக மகசூலுக்கு வழிவகை செய்யப்பட்டுள்ளது, என்று அரசு செய்திக் குறிப்பில விளக்கம் வேறு தரப்பட்டுள்ளது.

சொன்னது படியே கடந்த 6 ஆம் தேதி மேட்டூரிலிருந்து தண்ணியையும் திறந்து விட்டு, 9 ஆம் தேதி கல்லணையிலிருந்தும் தண்ணீரைத் திறந்து விட்டார்கள். அதே சமயம் 6 ஆம் தேதி மேட்டூரில் தண்ணீர் திறந்துவிட்ட அடுத்த 2 மணி நேரத்திலேயே அங்குள்ள 250 மெகாவாட் மின் உற்பத்தி திறன் கொண்ட நீர்மின் உற்பத்தி தொழிற்சாலையும் இயங்க ஆரம்பித்து விட்டது. இபோழுது கொஞ்சம் பிடிபட ஆரம்பித்திருக்கும் என நினைக்கின்றேன்.

அதனால் என்ன? அரசு சொன்னதும், செய்ததும் நியாயம் தானே? முன் கூட்டியே திறந்தால், ஒரு மாதம் முன்பாகவே தண்ணீர் கிடைத்தால், கடைமடை விவசாயிகள் அனைவருமே இரண்டு போகம் நெல் பயிரிட்டு... அவர்களுக்கும் லாபம் இரட்டிப்பாகும், விவசாய கூலிகளுக்கும் தொடர்ந்து வேலை கிடைக்கும், அதிக வரத்தின் காரணமாக அரிசி விலையும் குறையுமே? என்று நீங்கள் கேட்பது புரிகிறது!!

ஆனால் அரசு இதை அறிவித்து செயல்படுத்துவதற்கு முன்பாக விவசாயிகளிடம் இதைப்பற்றி கலந்தாலோசித்ததா? அவர்களது கருத்துக்களையாவது கேட்டறிந்ததா? என்றால் அது தான் இல்லை. இங்கு (டெல்டா மாவட்டங்களில்) நிலைமையே வேறு மாதிரியாக இருக்கின்றது. 

முதலில் ஒவ்வொரு ஆண்டும் தண்ணீர் திறந்து விடுவதற்கு 2 மாதங்களுக்கு முன்பாகவே ஆறுகள், ஏரிகள், குளங்கள், வாய்க்கால்கள் அனைத்தும் தூர்வாரப்படும். அப்படிச் செய்தால் தான் தண்ணீர் வந்தவுடன், அதில் பெரும்பகுதி உபயோகத்திற்கும், நிலத்தடி நீர்மட்டத்தை உயர்த்தும் சேமிப்புகளுக்காகவும் பயன்படுத்த முடியும். அப்படித் தூர்வாராவிடால் தண்ணீர் விரயமாகி, சிறு வாய்க்கால்கள் எல்லாம் உடைப்பு எடுத்து விவசாயத்திற்கு பயன்படாமல், சமவெளிகளில் புகுந்து மக்களுக்கும் தொல்லையாக முடியும்.

இந்நிலையில் புதிய அரசு பொறுப்பேற்று 15 நாட்கள் கழித்துத் தான் விவசாயிகள் கதறியபிறகு தூர்வாரும் பணி தொடங்கப்பட்டது. இதில் 100 நாள் வேலைத் திட்டம் வேறு நிறுத்தப் பட்டிருப்பதால் பெருமளவில் மக்களைக் கொண்டுவந்து இப்பணியில் ஈடுபட வைக்கவும் இயலவில்லை. கல்லணையிலிருந்தே நீர் திறந்துவிடப்பட்ட இந்த நிலையிலும், இதுவரை டெல்டா பகுதிகளில் தூர்வாரும் பணி நடைபெறவில்லை என்பது தான் நிதர்சனம். 

அடுத்ததாக...,  முக்கியமான விஷயம், அரசாங்கம் சொல்வது போல் அனைத்து விவசாயிகளுமே இரண்டு போகம் பயிர் செய்யப்போகின்றார்களா? என்றால் அது தான் இந்த வருடத்தின் மிகப்பெரிய சவாலாக இருக்கின்றது.  

இதில் என்ன சவால் என்கின்றீர்களா? இது ஒரு வித்தியாசமான பிரச்சினை தான். சென்ற ஆட்சியில் நீர் மற்றும் நில வளங்களைப் பெருக்கும் நோக்கில் ஆற்றுப் படுகைகளில் நிறைய மரங்களை நட்டு வளர்க்க ஆரம்பித்தார்கள். இதில் மாவட்ட அரசு நிர்வாகங்கள் பல தன்னார்வ தொண்டு நிறுவனங்களை இணைத்துக் கொண்டு டார்கெட் நிர்ணயித்து காடுகளை வளர்த்தார்கள். இது ஒரு அவசர அவசிய திட்டமாக நிறைவேற்றப்பட்டது. இப்படி வளர்க்கப்பட்ட மரங்களில் நிறைய கொடுக்காப்புலி மரங்களும் அடங்கும். வளர்க்கப்பட்ட இந்த காடுகள் அனைத்தும் வனத்துறை வசம் வந்தது. 

காடு வளர்ப்பது நல்ல விஷயம் தானே? இதில் என்ன தவறு கண்டீர்கள் என்கின்றீர்களா? நல்ல விஷயம் தான். குறை எதுவும் சொல்லவில்லை. காடுகள் உருவாகும் பொழுது அதோடு சேர்ந்து சில விலங்குகளும், பறவைகளும் உருவாவதும் இயல்பு தானே. அந்த வகையில் இந்தப் பகுதிகளில் நிறைய மயில்கள் பெருகி வளர ஆரம்பித்து விட்டன. "கிளிக்கு ரெக்க முளைச்சிடுத்து... ஆத்த விட்டு பறந்ந்து போயிடுத்து!" என்று சிவாஜி புலம்புவது போல, இந்த மயில்கள் வளர வளர அருகிலுள்ள வயல் பகுதிகளுக்கு வந்து, அங்கு வயல்களில் உள்ள பாம்புகளை பிடித்து உட்கொள்ள ஆரம்பித்து விட்டன. இது தான் பிரச்சினையே!

யோவ்..! பாம்ப புடிச்சா நல்லது தானய்யா...? அதுல என்ன தப்பு கண்ட? நல்லா வாயில வருது... பேசாம போயிடுன்னு.. நீங்க கத்துறது காதுல விழுது. வெயிட்டீஸ்... இப்ப வரேன்...!!

அந்த பாம்பெல்லாம் குறைய ஆரம்பிச்ச உடனே, அதுங்களோட ரெகுலர் டயட்டான எலிகளுக்கு கொண்டாட்டமாயிடுத்து! இப்ப புரிய ஆரம்பிச்சிருக்குமே?! அதனால வரலாறு காணாத எலித் தொல்லையை டெல்டா விவசாயிகள் அனுபவிக்க ஆரம்பிச்சிருக்காங்க. 

விதைவிட்ட நெல்லையே, அளவுக்கு அதிகமாக பல்கிப் பெருகியுள்ள எலிகள் இரவோடு இரவாக காலி செய்து விடுகின்றன. வளர்ந்த நாற்றுகளையும் கடித்து வைத்துவிடுகின்றன. ஆகவே சொந்தமாக போர்செட் இல்லாத குறு விவசாயிகள் அனைவருமே, இந்த வருடம் மழை வந்த பிறகு (மழையில் எலித்தொல்லை கொஞ்சம் குறையும்) ஒரேயடியாக சம்பா மட்டும் நட்டுவிடலாம். இந்த வருடம் குறுவை வேண்டாம் என்ற முடிவுக்கு வந்துவிட்டார்கள். 

இங்கு சொந்தமாக போர்செட் வைத்துள்ள பெறு விவசாயிகள் வசம் 60 சதவிகித விளை நிலங்களும் குறு விவசாயிகளிடம் 40 சதவிகித நிலங்களும் இருக்கின்றன. குறு விவசாயிகள் ஒருபோகம் தான் என்று தெள்ளத் தெளிவாக முடிவெடுத்துவிட்ட நிலையில் பெறு விவசாயிகள் ஆற்றில் ஒரு கால் சேற்றில் ஒரு கால் என்ற நிலையில் எலித்தொல்லைக்குப் பயந்து மழைக் காலத்திற்கு இன்னும் முழுதாக இரண்டு மாதங்கள் இருக்கும் நிலையில் பயிரை எப்படி பாதுகாப்பது? பாதிப்பு வந்தால் பெறு நஷ்டமாகிவிடுமே, குறு விவசாயிகளும் சேர்ந்து நடவு செய்தால் நஷ்டம் வரும்போது போராட்டம் நடத்தி நஷ்ட ஈடு பெறலாம், அதற்கும் வாய்ப்பில்லை என்கிற போது ரிஸ்க் எடுக்க தயங்கி விதை விட்டவர்கள் கூட நடவு செய்ய பின் வாங்கும் நிலையில் இருக்கின்றார்கள்.

ஆக இங்கு காவிரி டெல்டா பகுதிகளில் சென்ற வருடங்களில் குறுவை சாகுபடி செய்தவர்களில் பெரும்பாலானவர்கள், இந்த வருடம் சம்பா மட்டும் ஒரு போகமாக பயிரிடும் முடிவுக்கு வந்து விட்டார்கள். இது தான் இன்றைய நிலை. 

இந்த நிலையில் வழக்கம் போல் ஜூன் 12 ஆம் தேதிக்குப் பிறகு தண்ணீர் திறந்து விட்டாலே கூட விவசாயிகளுக்கு பெரிய சந்தோஷம் இருக்கப் போவதில்லை. இது வெறும் புள்ளி விவர சாதனைகளுக்காக ஆட்சி செய்யும் அரசாக இல்லாமல், உண்மையிலேயே மாநில முன்னேற்றத்தில் அக்கறையுடன் செயல்படும் அரசாக இருக்கும் பட்சத்தில், உடனடியாக போர்க்கால அவசரத்தில் செய்ய வேண்டிய வேலை, டெல்டா மாவட்ட விளை நிலங்களில் பெருகியிருக்கும் எலிகளை ஒரு கூட்டு முயற்சியை உருவாக்கி அழித்தொழிப்பது தான்.

கடந்த 20 நாட்களாக விவசாயிகள் பல வழிகளிலும் எலிகளை ஒழிக்கப் போராடிக் கொண்டிருக்கின்றார்கள். குருணை என்றழைக்கப் படுகின்ற எலி பாஷாணத்தை எலிப் பொந்துகளில் போட்டுவிட்டால், எலி இறந்து போகும். ஆனால் ஒரு வாரத்திற்கு ஆடு, மாடுகள் வயல்வெளிப் பக்கம் சென்று விடக் கூடாது. பயிர்களுக்கும் கூட அது நல்லதில்லை என்கிறார்கள். பொறி வைத்துப் பிடிப்பது, கிட்டி வைத்துப் பிடிப்பது என்று விவசாயிகளுக்குத் தெரிந்த எந்தவொரு பழைய முறைகளுமே, இந்த வருடம் பல்கிப் பெருகியிருக்கும் எலிகளை ஒழிக்கப் பயன்படவில்லை. 

ஏனெனில் ஒரு ஜோடி எலி ஒரே ஆண்டில் இரண்டாயிரம் எலிகளை உற்பத்தி செய்கிறது.(அம்மாடியோவ்வ்!!). எட்டு எலிகள் ஒரு தனி மனிதனுக்குத் தேவையான உணவை சாப்பிடுகின்றன. அவை தான் சாப்பிடுவதை விட மூன்று மடங்கு அதிகமாக உணவுப் பொருட்களை வீணடிக்கின்றன!

 
நண்பர்களே, இப்பொழுது உங்களுக்குப் புரிந்திருக்கும் என நினைக்கின்றேன், விவசாயிகளுக்கு முன்னே உள்ள உடனடிப் பிரச்சினை எதுவென்று?! ஆனால் அதுகூடத் தவறு தான்! ஏனெனில் இது அவர்களுடைய பிரச்சினை அன்று. ஏனெனில் கிட்டத்தட்ட எல்லா விவசாயிகளுமே ஏதாவது ஒரு மாதச் சம்பள வேலையிலோ அல்லது சிறு தொழில் ஒன்றை செய்து கொண்டோ தங்கள் வயிற்றுப் பிழைப்பிற்கு வழி தேடிக் கொண்டுவிட்டார்கள். அவர்களுடைய சாப்பாட்டிற்கான தேவைக்குரிய நெல்லும் பயிர்செய்து கொள்வார்கள். ஆனால் இந்த வருடம் ஒரு 40 சதவிகித நெல் உற்பத்தி பாதிப்பு என்பது அரிசியில் மிகப் பெரிய விலையேற்றத்தைக் கொண்டு வந்துவிடும். அவை அனைத்துமே நம் தலையில் தான் வந்துவிழும்!!

ஆகையால் மக்களே தயை கூர்ந்து இதை விவசாயிகளின் தனிப்பட்ட பிரச்சினையாகப் பார்க்காமல், இன்னும் 6 மாதத்தில் நம்மையும் பாதிக்கப் போகின்ற பிரச்சினை என்பதை உணர்ந்து, அவரவர்க்கு ஏதுவான வழியில் இதை அரசாங்கத்தின் காதுகளுக்கு கொண்டு செல்வது நமது கடமை என்று எண்ணுங்கள். ஆவண செய்யுங்கள்.

கர்நாடகாவிலிருந்து நீர்வரத்து இன்னும் ஆரம்பிக்காத நிலையில் இருக்கின்ற நீரை இப்பொழுதே திறந்து விட்டால், தூர்வாருதலும் முடிவுறாத நிலையில், பெறுமளவு விவசாய வேலைகளும் ஆரம்பிக்காத நிலையில் அது வீண் விரயமாகிவிடும். இன்னும் பத்து நாட்களுக்குள் நீர் மட்டம் 70 அடிக்கு கீழே சென்றுவிடும். இந்த வருடம் ஆடி மாதத்திற்கு பிறகே பெறுமளவு விவசாயிகள் சம்பா பயிரிடுவதற்காக முற்படும் பொழுது, பெரிய அளவில் நீர்த்தேவை இருக்கும். 

அந்த நேரத்தில் அணையின் நீர் மட்டம் குறைவாக இருந்தால் இங்கு விவசாயம் பாதிக்கும். இப்பொழுது கேரளாவில் பயணத்தை ஆரம்பித்திருக்கும் தென்மேற்கு பருவ மழை, ஆடியில் இங்கு காற்று ஆரம்பித்து அடிக்கும் பொழுது தான் கர்நாடகா பக்கமாக வந்து, அங்குள்ள நான்கு அணைகளையும் நிரப்பி விட்டு, ஆடிமாதக் கடைசியில் தான் மேட்டூருக்கு வரும் அளவிற்கு வழிவகை செய்யும். ஆகவே ஆடி மாதத்தில் முதல் இருபது நாட்களுக்கு இப்பொழுது சேமித்து வைத்திருக்கும் தண்ணீரை பயன்படுத்தினால தான் விவசாயிகளுக்கு உண்மையான பலனாக அது அமையும்!

அதன் பிறகு ஆடிக் கடைசியும், ஆவணியும் கர்நாடகாவிலிருந்து கிடைக்கும் உபரி நீரை வைத்துக் கொண்டு ஓட்டிவிடலாம். அதற்குப் பிறகு இருக்கவே இருக்கின்றது நம்முடைய வடகிழக்குப் பருவமழை!. 

ஆக.. நண்பர்களே இப்பொழுது நீங்களே முடிவு செய்துகொள்ளுங்கள், முன்கூட்டிய அணை திறப்பு சாதனையா? அல்லது வேதனையா? என்று!!!

கழுகிற்காக

கொக்கரக்கோ

(கழுகு இன்னும் உயரப்பறக்கும்)

Read more »

பஞ்ச்' சாமிர்தம்.....நிஜமாவே இனிக்கும். (09.6.2011)

பஞ்ச் 1

=======

ஈழப்பிரச்சினையில் கருணாநிதி நாடகமாடியிருக்கிறார் என்பது எல்லோருக்கும் தெரிஞ்ச விசயம்தானே.....? இதைப்போய் மாண்புமிகு முதல்வர் ஒரு கருத்து எடுத்து தமிழ்நாட்டு ஜனங்களுக்க் சொல்லி நல்ல பேரு எடுத்துக்க வேண்டியது இல்லை. நீங்க என்ன செய்யப் போறீங்கனு நாங்களும் பாக்கத்தானே போறோம். சென்ட்ரல் கவர்மெண்டுக்கு ஆப்பு வைப்பீகளா இல்லை பாராளுமன்ற தேர்தல்ல கை கோப்பீகளான்னு....! எப்படி பாத்தாலும் ஒரு தீர்மானம் நிறைவேற்றி இருக்கீங்க....அது வரவேற்கப் படவேண்டியதுதான்.

இதுக்கு இடையில் முதல்வர் மேல இருக்குற சொத்து குவிப்பு வழக்கு வேற வர்ற 15 ஆம் தேதி க்கு வருதாம்...! பாத்து முடிச்சு உடுங்க அம்மா...!

பஞ்ச் 2

=======

ப.சிதம்பரம் ஐயா பண்ற காமெடி அநியாயத்துக்கு போய்கிட்டு இருக்கு. ராம் தேவ் ஆயுதம் ஏந்துவேன்னு சொன்ன உடனே சாமியாரோட சாயம் வெளுத்துப் போய்ட்டதா  உடனே ஒரு அறிக்கை...! ஏனுங்க அண்ணாச்சி....நாட்டுக்குள்ள ஆயுதத்தோட வந்து கொள்ளை உசுருகள கொன்ன தீவிரவாதிக ஊசுர காப்பாத்த எம்புட்டுங்க சாமி செலவழிக்கிறீக மாசத்துக்கு....!

சாமியாரு கெட்டவருன்னே வச்சுக்கிடுவோம்.. நீங்க நல்லவகளா? உங்க சாயம் தமிழ்நாட்ல வெளுத்துப் போயி துணியே இல்லாம நிக்கிறீயளே...உம்ம உடம்புகள பாரும்!

பஞ்ச் 3

======

ஒவ்வொரு காலத்துலயும் ஒண்ணு ஒண்ணுதான் செய்ய முடியும். ரஜினி சார். உங்களுக்குத் தெரியாதது இல்லை. எப்டி எப்டி எல்லாமோ நடிச்சீங்க. ரசிச்சோம். வயசு ஆச்சுன்றது உங்களுக்கும் தெரியும் எங்களுக்கும் தெரியும். நடிக்க வேணாம்னு சொல்லல உங்க வயசுக்கு ஏத்த கேரக்டர் ரோலா பத்து செய்ங்க சார் இனிமேயாச்சும். நடிக்கிறத விட நீங்க உயிரோட இருக்குறது முக்கியம் இல்லீங்களா...! நல்லபடியா பொழச்சு எந்திருச்சு வாங்க மகராசான்னு வேண்டிக்கிறோம்.

பஞ்ச் 4

======

பள்ளிக்கட்டணம் முறைகேடா வசூலிச்சா நடவடிக்கை எடுப்போம்னு  அரசு அறிவிச்சு இருக்கு. இதை ஒழுங்க நடைமுறை படுத்தி கன்னா பின்னானு வசூல் செய்யும் வசூல் ராஜாக்களை கண்ட்ரோல் பண்றது மட்டும்  வேலை இல்லிங்க.. அப்டி வசூல் பண்றவங்கள கண்டுக்காம விடுறதுக்கு லஞ்சம் வாங்கும் அதிகாரிங்கா மேலயும் நடவடிக்கை எடுக்கணும். மொத்தமா எல்லாம் ஒழுங்கு மேனிக்கு நடந்த எங்க புள்ள குட்டிய பொழச்சுப் போகும் சாமியோவ்...!

பஞ்ச் 5

=======

தமிழ் ஈழக் கொடிக்கு பிரிட்டன் அனுமதி கொடுத்து இருக்கு தடை கிடையாதுன்னு...ஆனா ஏழு கோடி பேரு இருக்குற தமிழ் நாட்ல....ஊர்ல இருக்குற தமிழனுக்கு எல்லாம் தாய்த்தமிழனா இருக்குற நாம கொடிய உபயோகிக்க முடியாது. தனித்தமிழ் ஈழம் பற்றி பேச முடியாது.. அப்டி இப்டின்னு சட்டம். இறையாண்மை ஸ்ட்ரெய்ட்டா வந்து நம்ம குரல்வளைய பிடிக்கும். ஒட்டு மொத்த மாநில கட்சிகளையும் அழிச்சுட்டு தான் மட்டும் இந்த தேசத்தின் ராஜாவ இருக்குற காங்கிரச இந்த இறையாணமை ஒண்ணியும் செய்யாது... ஏன்னா நாமதான் இளிச்சவாய்த்தனமா காங்கிரசுக்கு ஓட்டு போட்டுட்டு. .வானத்தை பாத்துகிட்டு நிக்கிறோமே...!

தனித் தமிழ் ஈழத்துக்கு ஆதரவு கொடுத்தவங்கதான் இந்திராகாந்தி அம்மையார் எல்லாம்... அவுங்களும் காங்கிரஸ்தானே?  இந்திரா காங்கிரசுக்கு இந்தியான்னா என்னனு தெரியும்..? சோனியா காங்கிரசுக்கு மாஃபியா வேலைதானே தெரியும்...! காலக் கிரகம்.

(கழுகு இன்னும் உயரப்பறக்கும்)

Read more »